Ulah Pandikar nyaup ngempung peranak Sarawak - Berita Iban Online

Header Ads

  • Baru Nyadi

    Ulah Pandikar nyaup ngempung peranak Sarawak

    Dato Peter Minos
    KUCHING: Speaker Dewan Rakyat, Tan Sri Pandikar Amin Mulia ti ngeleseika Sempekat Malaysia 1963 (MA63) sereta nyakap Kepala Menteri, Datuk Patinggi Abang Johari Tun Openg udah ngenyima ati peranak di nengeri tu, lalu nya ngempung peranak Sarawak nadai ngira bansa tauka politik.

    Pemerati politik, Dato Peter Minos madah, ulah Pandikar Amin baka nyuluk sarang manyi di Sarawak, berindik ari nya manah agi iya nyurutka diri.

    “Taja pia, aku patut nyebut jaku tu ngagai iya (Pandikar Amin), terima kasih laban udah enda sengaja ngempung peranak Sarawak lalu ngidupka ‘Semangat Sarawak’ ngambika mansang ke mua ba pengawa ngetan sereta nyukung bala ketuai tetinggi sida, Kepala Menteri Abang Johari,” ku iya.

    Ku Minos, penaluk beserakup peranak Sarawak nyata dipeda lebuh parti politik sekalika ari komponen Barisan Nasional (BN) tauka penyakal, orang ngatika diri sereta mensia mayuh bela nyingkang ke mua sereta ngutuk ulah Pandikar Amin enggau enda belalai.

    Parti tu nyengkaum Parti Pesaka Bumiputera Bersatu (PBB), Parti Sa’ati Rayat Sarawak (SUPP), Parti Rakyat Sarawak (PRS), Parti Bersatu Rakyat (UPP), Parti Progresif Demokratik (PDP), Parti Keadilan Rakyat (PKR), sereta Parti Bansa Dayak Sarawak Baru (PBDSB).

    “Tu pengeringat ti tulin semua peranak Sarawak ngagai siku orang ti nadai ngayanka basa ngagai Sarawak tauka Kepala Menteri.

    “Nya kering sereta nyata, ukai melakun lalu ukai sengaja ditempa. Balat agi datai ari penemu diri empu,” ku iya ba penerang berita,ensanus.

    Di belakang semua tu ku iya, nya ngidupka ‘Semangat Sarawak’, iya nya pengingin ke bendar enggau juluk peranak Sarawak deka diintu sebela sereta lurus sebaka enggau peranak di Semenanjung Malaysia.

    Peranak Sarawak mega dekaka hak sereta kuasa autonomi ti ‘lenyau’ ari MA63 dipulai, sereta bisi pengingin deka ngasaika perengka guna jalai besai, jalai keretapi, palan penyangkai kapal, padang bilun, jematan, projek mensia mayuh, sekula, kolej, universiti, sepital, perengka guna mensia mayuh, pemansang ekonomi enggau mayuh ke bukai, baka di Semenanjung Malaysia.

    Ku Minos, diatu mayuh peranak Sarawak berengkah nemu  hak sida sereta tau manding mayuh pekara entara Sarawak enggau Semenanjung Malaysia, nya kebuah berengkah nuntut hak ari baruh MA63, iya nya belanja mayuh agi ungkup nengeri tu, kelimpah asil penatai pemisi ke tinggi agi ari minyak enggau gis.

    “Nyadi peranak asal Sarawak, aku madahka pekara dipinta enggau ditegika bala bakih ari Sarawak endang patut sereta diaku, nya alai patut diputarka Kuala Lumpur (Perintah Besai), taja pan barang ku sebut sida.

    “Pengasai ke amat, tulin sereta juluk peranak Sarawak enda ulih diteju pia aja tauka enda dikeibuh tauka enda diperati,” ku iya nandu.

    Ku Minos, taja pia nya patut diterang enggau nyentuk peranak Sarawak, ke nyadi peranak Malaysia, bebasa sereta angkunka menua tu lalu pekara tu enda ulih dipetalatka.

    “Pekara ke nyadi diatu iya nya peranak Sarawak, nyadi rayat Malaysia ti enggai disiping enggau bisi penyemaka sereta basa, pemereti enggau dikenang, nya aja.

    “Pekara tu mega nyata, ke alai Sarawak endang jauh endar tinggal ba semua pekara enggau bidang nyema dibanding enggau Semenanjung Malaysia,” ku iya. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads