Zon Tengah udah besedia besemekih ba SUKSAR kena 14-17 Disember - Berita Iban Online

Header Ads

  • Baru Nyadi

    Zon Tengah udah besedia besemekih ba SUKSAR kena 14-17 Disember

    Hii Chang Kee
    SIBU: Pengering ati deka nyadika ‘senyata’ kontinjen Zon Tengah besemekih enggau tim bukai ngulihka gelar champion ba Sukan Sarawak (SUKSAR) ke deka diatur 14 nyentuk 17 Disember tu di Kuching.

    Taja pan baka nya, Ketuai Kontinjen Zon Tengah Hii Chang Kee madah, tim iya nadai ngeletak nama-nama juluk ati ba lumba nya.

    “Ke beguna iya nya kitai deka nyabung pengering ati besemekih ngulihka pemujur ba 16 bengkah main ke diatur ba lumba tu.

    “Ari nya, kitai andal tim Zon Tengah deka ulih mai nama ke manah maya tu ila,” pia ku iya madah maya berandau enggau pengarang berita.

    Dulu agi ari nya, iya nerima menira kontinjen Zon Tengah ari Kaban Kunsil Nengeri (ADUN) Dudong Datuk Tiong Thai King ba Kingwood Hotel ditu, lemai kemari.

    Hii ti mega Residen Sibu madah, piak sida udah belabuh ngatur macham bengkah pekit kenyau ari bulan Julai tu tadi dikena milih atlet ke pemadu nyulut sebedau sida belatih ba endur diri empu.

    “Ngarapka bala atlet kitai naka alah besemekih enggau orang bukai ngulihka pemujur,” ku iya sambil minta bala atlet nemu ngibun ulah diri enggau nama tim sepemanjai lumba nya diatur.

    Kontinjen Zon Tengah deka nganjung 209 iku atlet enda nyengkaum 53 pemesai enggau 22 iku secretariat.

    Sida deka meleka ari Sibu pagi pagila (sehari tu) ngena tujuh buah bas ngelawa Kuching.

    SUKSAR 2017 diatur ba Kompleks Sukan di Petra Jaya, Kuching lalu sitak Kuching dipadu nyadi tuai pengatur serak tu.

    Kelimpah kontinjen Zon Tengah (Kapit, Sibu enggau Mukah), tim ke bukai iya nya kontinjen Zon Utara (Limbang, Miri enggau Bintulu), kontinjen Zon Timur (Sarikei, Betong enggau Sri Aman) enggau kontinjen Zon Selatan (Kuching, Samarahan enggau Serian).

    Lumba empat hari tu deka nyadi platform dikena tim Sarawak milih atlet besemekih ba SUKMA 2018 ke deka diatur di Perak taun ti deka datai. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads