Header Ads

  • Berita Tebaru

    122 unit RMR deka digaga di Kampung Bunga Rampai, ku Lo

    Lo Khere Chiang
    KUCHING: Urung 122 unit Rumah Mampu Milik (RMR) deka digaga di Kampung Bunga Rampai, kena nyendiaka perengka guna pengawa berumah ngagai sida ke diau di kandang menua nya.

    Kaban Kunsil Nengeri (ADUN) Batu Kitang, Lo Khere Chiang, madahka pengawa ngaga projek nya, asil ari peminta Kepala Menteri, Datuk Patinggi Abang Johari Tun Openg laban kelimpah ari meri pengelantang pendiau pengawa berumah, nya mega ulih mutarka penanggul ampuh bah sereta napi penanggul tanah tusur ke udah lama ngirauka ati mensia mayuh ti diau di sitak nya.

    Nengah penerang ke diterima, mayuh ari peranak ke diau di Kampung Bungai Rampai ngaga rumah sida ba tebing sungai ke ngujungka sida napi penusah ampuh bah sereta mega kena tinggang penusah tanah tusur.

    Nya alai, ku iya, nengah pemisi RMR ke disediaka nya, deka mindahka komuniti ti diau ba sitak nya ngagai genturung pendiau ke likun agi kelimpah ari ulih diau ba endur ke bisi pengelantang.

    “Aku gaga endar ati laban nyauka 35 taun, peranak ke diau di Kampung Bunga Rampai nganti projek nya tembu lalu aku pechaya, projek tu deka mutarka penanggul sida bekait enggau penusah ampuh bah sereta tanah tusur ke ngirauka ati sida,” ku iya.

    Iya madah munyi nya, pengudah meda pengawa nyerahka surat Ngempu Endur Ngaga Rumah nya, Projek RMR Kampung Bunga Rampai ari Opis Pemansang Pengawa Berumah (HDC) Sarawak ngagai kunteriktor Saratech Sdn. Bhd. Ditu, kemari.

    Sama bisi enggau ngulu atur pengawa nya kemari, Ketuai Pemesai Eksekutif (CEO) HDC Sarawak Mohamad Asman Ahmad, Pemesai Pelilih Menua Bau Anielia Siam enggau Tuai Kampung Bunga Rampai, Rafaee Bujang.

    Iya nandu baru madahka, timpuh pengelama ngaga 122 unit RMR nya ba tanah pemesai urung 11 ikar ila, dipelabaka deka ngena timpuh 21 bulan, enggau ungkus ngaga manggai urung RM23 juta.

    Iya nandu baru madahka, tiap buah unit rumah teres setingkat nya ngembuan pemesai 700 kaki persegi deka digaga enggau tiga buah bilik tinduk, dua bilik mandi/agu enggau siti endur alai paking kerita.

    Ba lansa bukai, Mohamad Asman nyamin, iya nya HDC deka beratika penuduk projek nya, laban deka beratika rumah nya deka digaga dalam timpuh ke udah ditetapka, ku iya. #UtusanBorneo

    No comments

    Post Top Ad