Header Ads

  • Berita Tebaru

    124 iku peranak Rumah Jawa dikeruga penusah tanah tusur

    Gambar Penusah Tanah Tusur di Rumah Jawa
    SARIKEI: Pengelikun 124 iku peranak ari Rumah Jawa, Kerubong, Sarikei diatu dikeruga tanah tusur ke bisi nyadi urung 30 kaki di belakang rumah panjai nya, tumu pagi kemari.

    Ketuai Opis Bomba enggau Penyah Penusah Sarikei, Suna Kaha madahka peranak dia sedarka penusah tanah tusur nyadi urung pukul 5 pagi.

    “Berindik ari nya, peranak udah ngangauka raban Bomba lalu pengudah nerima kangau pasal penusah nya, beberapa iku raban sida enggau kereban udah digerah ngesah ngagai endur penusah nyadi.

    “Asil ari perati enggau penerang diterima ari peranak rumah panjai nya, penusah nyadi ketegal ujan lebat nadai ngetu kenyau ari lemai kemari nyentuk tumu pagi.

    “Nya alai kami ngelalau peranak rumah panjai seruran bejaga laban tanah tusur tau nyadi sebarang maya nyema ujan majak labat,” ku iya madah ngagai media, kemari.

    Rumah Jawa, Kerubong, Sarikei di jalai Selalang Sarikei iya nya lebih kurang 30 kilometer ari pasar Sarikei lalu bisi 21 pintu bilik.

    Berindik ari penusah nya, Suna mega ngelalau peranak gawa ngebap kandang tanah ke tusur ngena kanvas, nyeliahka tanah terus labuh.

    “Berebak enggau nya, peranak dilalau ngangauka raban bomba enggau jampat nyema penusah majak balat nuntung,” ku iya nandu nyemetak. #UtusanBorneo

    No comments

    Post Top Ad