Header Ads

  • Berita Tebaru

    31 iku pengari Bumiputera nguasa penuduk ari PBB

    Datuk Amar Mohd Asfia Awang Nassar
    KUCHING: Sayap Bumiputera dalam Parti Pesaka Bumiputera Bersatu (PBB) deka terus nguasa parti nengah 31 iku pengari ari semua 45 penuduk.

    Kaling ti sama berakup numbuhka PBB iya nya sayap PESAKA diatu nguasa 14 penuduk ti ngempuru pengari ari raban bansa Dayak.

    Ketegal nya, Presiden PBB (ari sayap Bumiputera) Datuk Patinggi Abang Johari Tun Openg otomatik nyadi Kepala Menteri Sarawak ke alai iya nguasa penuduk ke pemadu mayuh dalam Dewan Undangan Nengeri (DUN).

    Kelimpah nyadi presiden PBB, Abang Johari mega nyadi Chairman Barisan Nasional (BN) Nengeri ke alai iya nguasa 72 ari semua 82 penuduk, ngelui ari dua per tiga majoriti.

    Chairman (tetap) PBB Datuk Amar Mohd Asfia Awang Nassar lebuh dikerandau bedau lama tu tadi netapka pangku pengawa presiden PBB unik ketegal ti bekait enggau pangku pengawa kepala menteri.

    Ku Asfia, pengudah kepala menteri dichiri nengah konstitusyenal Nengeri, kepala menteri nya deka ‘otomatik’ nyadi presiden PBB nengah Genteran 15 (7).

    “Iya otomatik nyadi presiden parti ke alai pangku pengawa nya enda dipekit sereta enda ulih dilaban. Pekara tu enda bisi ba parti bukai lalu unik ba PBB,” ku Asfia.

    Iya ke mega Chairman Komiti Pengawa Bepilih PBB rambau Gempuru Besai PBB bulan Februari tu madah pangku pengawa kepala menteri dichiri Gabenor nengah Konstitusyen Nengeri ari raban DUN ti diasaika iya (Gabenor) ngembuan sukung majoriti ba dewan.

    PBB deka ngatur Gempuru Besai Tiga Taun Sekali berengkah 8 nyentuk ngagai 11 Februari 2018 lalu deka dipenyadi Menteri Besai Datuk Seri Najib Tun Razak.

    Ari sukut pemayuh penuduk DUN ke dikuasa, PBB mengkang nyadi parti ke pemadu bekuasa nengah 45 penuduk lalu ditangkanka Parti Rakyat Sarawak (PRS) nengah 11 penuduk.

    Nangkanka nya, Parti Se’ Ati Rakyat Sarawak (SUPP) nengah 7 penuduk, Parti Rakyat Bersatu (UPP) lima sereta Parti Progresif Demokratik (PDP) empat.

    Ba sentang PBB ti nguasa 45 penuduk, 22 ari semua penuduk nya dikuasa bansa Melayu lalu ditangkanka Melanau nengah 9 penuduk.

    Sayap PESAKA ti bisi 14 penuduk diarika Iban (7 Penuduk), Bidayuh (5) enggau Orang Ulu (2). #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads


    Deka nemu berita benung #Viral ninting hari: