Header Ads

  • Berita Tebaru

    Abang Johari siku ketuai ke manah, ku Masing

    Tan Sri Datuk Amar Dr. James Jemut Masing
    KUCHING: Kepala Menteri Sarawak Ke Enam Datuk Patinggi Abang Johari Tun Openg mudah diimbai sereta seruran deka mendingka penemu orang bukai.

    Mansutka jaku nya, Sapit Kepala Menteri Tan Sri Datuk Amar Dr. James Jemut Masing madah nya ngayanka Abang Johari siku ketuai ke manah.

    “Abang Johari siku ketuai ke landik mendingka jaku orang. Iya mendingka tetiap perambu ari raban ketuai sereta kaban dalam parti.

    “Ketegal nya, atur mantu iya (Abang Johari) bejalaika tusun merintah Sarawak ulih dikemujur enggau mudah,’ku Masing ke mega Presiden Parti Rakyat Sarawak (PRS) bejaku ngagai Utusan Borneo kemari.

    Berindik enggau nya Masing ngarap semua parti dalam gempung Barisan Nasional (BN) meri sukung ke tegap ngagai Abang Johari ba Pengawa Bepilih Besai Ke 14 (PRU14) ti deka datai.

    Ku iya ke mega Menteri Pemansang Infrastruktur enggau Perengka Pengangkut sereta Adun Baleh, sukung nya meseti dipandang sebedau, maya sereta pengudah PRU14.

    ‘Semua pekara ke udah diputus sebedau PRU14 tu ila meseti dititih semua ketuai dalam parti,’ku Masing.

    Ngenang kaul ke sama, Presiden Parti Demokratik Progresif (PDP) Datuk Tiong King Sing netapka Abang Johari siku ketuai ke proaktif sereta kreatif.

    Ambika chunto ku Tiong, kepala menteri udah ngemendarka dua projek ngaga jematan di Bintulu, iya nya Jematan Kemena enggau Jematan Sebauh.

    “Kededua jematan tu dianti peranak di Bintulu lalu deka berengkah digaga ba taun tu.

    “Berindik enggau nya, semua rayat Sarawak meseti nyukung Abang Johari,’ku Tiong ke mega Kaban Parlimen (MP) Bintulu.

    Abang Johari udah mai mayuh ubah ba Sarawak kelebih agi ba sentang pengawa mulaika kuasa ngagai Sarawak, tandu Tiong.

    Kena 13 Januari 2017, Abang Johari ngangkat sumpah nyadi Kepala Menteri Keenam ba mua Tuai Megai Menua(TYT) Tun Pehin Sri Abdul Taib Mahmud di Astana pengudah Kepala Menteri Niang  Pehin Sri Adenan Satem midang ketegal komplikasyen jantung kena 11 Januari 2017. #UtusanBorneo

    No comments

    Post Top Ad