Apai indai patut nyikap diri ngemesaika anak ti menyana -->
Cari Berita

Advertisement

Apai indai patut nyikap diri ngemesaika anak ti menyana

Admin | beritaiban@gmail.com
January 23, 2018

Dr Davis Johnraj
Pekara tu dikena nentuka bala nembiak besai enggau pengandal sereta ngembuan pengidup ti manah, ku Dr Davis.

BINTULU: Tetiap iku anak bebida lalu ti deka nyadi pengawa ke chukup mar ngagai apai indai iya nya meseti ulih nemu ni bagi jalai pemadu manah begulai enggau semua sida.

“Nyadi apai indai, kitai endang udah nemu nadai siku kitai di dunya tu menyana lalu kitai idup dalam dunya ti enda meruan, anak mega bisi ngembuan pengelemi tang kitai naka ulih ngemesaika sida, ngambika sida besai enggau pangandal,” pia ku Direktor Sepital Bintulu, Dr Davis Johnraj.

Iya nibak jaku orang ti bepenemu madahka sida ti nadai nyikap diri lebuh ti belaki tauka bebini baka terejun ke sungai tang nadai belajar baka ni deka nyemerai. “Aku mega pechaya bisi anak enggau enda sedia deka nyadi pemar lalu ba rebak ke diatu, ngemesaika anak ukai pekara muntang baka rebak ke dulu,” ku iya lebuhka bejaku rambau seminar ‘Parenting 3.0’ di sebuah hotel ditu, apin lama ke udah.

Ku iya, Bintulu bisi rikod pemadu tinggi nembiak indu betubuh bisi sereta sida ke beumur 14 enggau 15 taun beranak lalu nyadi indai.

“Nya alai, tu sempama baka nembiak ti ngibun nembiak mit ke bukai, tu pekara ti nyelaie, lalu ukai pekara ti manah ngagai nembiak,” ku iya nambah.

Ba pekara bukai, ku Dr Davis, kemaya hari, sida tu besai enggau semua perengka guna ke bisi dalam dunya.

Ku iya, bisi mega nembiak umur dua taun nerima pemeri hari pengada ‘ipad’, dikena sida rindang bemain.

Ku iya, nyadi apai indai ngembuan mayuh penguji lalu belalauka peneleba ti diasaika iya empu, bisi mayuh pekara nating runding ngasuh anak ulih mujur.

“Lebuh bini aku nganjung anak indu aku ke lumur dua sekula ba primari satu, iya udah bisi ninga ari bala indai ke bukai ba minggu keterubah di sekula, sida udah madah sida patut nganjung anak tuisyen laban bala anak sida meseti teulihka pemujur.

“Diatu, taja pen baru ba primari satu nembiak udah ditekan apai indai laban dekaka sida nyulut, teulihka pemutus peresa semua A, enda meretika pangka iya dudi hari, semua sida deka bisi batang pengawa kediri empu, nyulut ba batang pengawa diri empu, semua orang bisi pengelebih sida empu,” ku Dr Davis nambah.

Iya mega ngelalau apai indai badu mejal diri empu lalu pekara ti pemadu beguna iya nya apai indai patut nentuka sida bisi ngelimpangka awak diri begulai enggau bala anak sida.

Ku Dr Davis nambah, bala anak auska pengibuh laban sida mayuh agi ngena awak diri ba luar rumah lalu lebuh mulaika diri ke rumah, sida lelak lalu tindu.

“Anang enda ngelimpangka awak begulai enggau diri sebilik, aku pechaya tu beguna endar, siku pengajar ari sekula peribit madah ngagai aku, agi ba sekula primari, siku nembiak lelaki beumur 10 taun, kala datai ngagai iya lalu meri iya RM1,000, nembiak nya madah, tuju nya dikena nembiak nya berandau enggau iya pengelama sejam, sedar ke pekara nya, pengajar nya telefon ngagai apai nembiak nya,” iya tekenyit ninga saut apai nembiak nya, ti madah iya nadai entu awak begulai enggaua anak iya laban suah mindah jauh gawa.

Ku iya, diatu orang kiruh gawa sida dekaka pengajar di sekula ngibun anak sida, bisi mega bala anak nyau besai begulai enggau ama, enggau nadai kaul ari apai indai, sida besai dalam pemar.

“Baka ni kitai deka matih sida nyema kitai nadai ngayanka teladan ti manah, nyema tetiap kali kitai deriba ngelanggar atur, kitai deka meri chunto madahka sida, nadai ngawa ngelanggar atur,” ku iya nambah.

Nyadi direktor di Sepital Bintulu, ku Dr Davis, sida ngaul lebih ari 1,000 iku staf lalu pekara ti mar datai ari rebak Y, seraya rebak dudi mupuk datai, rebak ti deka besai enggau gajet teknologi tinggi.

“Antara rebak Y, kitai nemu penau sida mutarka keruga runding, chukup baruh, mayuh sida puntan, mayuh sida tu dijaga apai indai diri, berengkah ari ada dataika sida graduet ari kolej, lalu maya sida udah gawa, sida sedarka diri enda teputarka penanggul kediri empu.

“Urung 10 peratus ari lutur ngemaduka diri gawa beberapa bulan keterubah ngelapor diri gawa laban sida enda ulih mutarka pengusut runding, sida kelalu ngandalka apai indai, sida enda nemu nama reti jam penusah ti ditapi sida,” ku iya.

Nya alai iya ngelalau apai indai chukup sedia ari runding enggau batang tubuh sebedau tama ngagai dunya apai indai lalu siti pekara ti nyata, sida anang kelalu ngandai anak diri.

Gulu seminar apai indai enggau kus bekaul ke bukai, ku iya, tu jalai pemadu manah dikena sida nambahka pengelandik sereta mereti baka ni nyadi apai indai ti meruan ngagai bala anak sida.

“Nadai siku ulih madah sida apai indai ti menyana laban bisi pekara baru ti dipejalai sereta dikereja, nya kebuah aku ngarapka tu deka dipejalai sereta dikereja dalam ruang bilik kita, nempa rampa ngagai bala anak ti bepenau ulih dijapai,” ku Dr Davis.

Lebih ari 100 iku pesereta datai ari apai indak ke biak umur sereta bala pengajar bisi datai ngulu seminar tu.

Seminar tu udah diatur Persatuan Kebajikan Perkhidmatan Psikiatri Hospital Bintulu bekerejasama enggau Opis Pengerai Runding enggau Psikitri Sepital Bintulu sereta Unit Terapi Kereja Sepital Bintulu.

Batang tuju seminar tu deka mutarka isu angat kemari hari ba pekara nyadi apai indai ngaul sida ke biak, pangku pengawa gajet ngagai bala anak sereta nemu beratika pekara beduan enggau masung.

Seminar udah dikenataika Datin Dr Fauzi Ismail, udah pinchin nyadi Konsultan Anak Mit enggau Psikiatri Nembiak Opis Menteri Pengerai, enggau Dr Smrdhi Sarachandran, Pediatrik di Sepital Columbia Asia Bintulu.

Renggat keterubah begulai enggau Dr Smrdhi ti deka belicha pasal batang jurai ti manah endar - ‘Kids and gadgets: Development or disaster’.

Seraya Datin Dr Fauzi ngupas silik agi pasal dua batang pekara iya nya ‘Surviving your teenagers: Parenting adolescent’ enggau ‘Why don’t kids tell? Detecting bullying and sexual abuse’. #UtusanBorneo