Header Ads

  • Berita Tebaru

    Aplikasyen Kuching VR mujur dilancharka KM

    Datuk Patinggi Abang Johari Tun Openg
    KUCHING: Universiti Teknologi Swinburne kemari ngelanchar ‘360-degree Virtual Reality (VR)’, sebengkah aplikasyen telefon pintar ke dikelala nengah nama ‘Kuching VR.

    Pengawa ke diatur di ‘Lecture Theatre’ nya dikemujur Kepala Menteri Datuk Patinggi Abang Johari Tun Openg.

    Kuching VR meri awak ngagai mensia mayuh meda lalu ngasaika pemanah palan pemerindang ke mega nyadi palan pematak temuai di Mengeri Kuching.

    Kelimpah ari nya, aplikasyen nya mega mandangka semua pekara ke bisi di Universiti Teknologi Swinburne kampus Kuching.

    Bejaku rambau pengerami, Abang Johari ke mega Pro Canselor Universiti Teknologi Swinburne pechaya universiti nya ulih nyaup Sarawak mansang ba teknologi digital.

    “Teknologi VR tu nyadika pelasar endur kitai nempa aplikasyen bukai.

    “Kitai ulih ngubah atur ekonomi, nyapai juluk ke ditetap iya nya ari Virtual nyadi nyata.

    “Perintah Nengeri deka meri sukung lalu kitai deka mansang mujur ba digital virtual,’ku iya.

    Dulu agi ari nya, Sapit Mandal Chanselor ke mega CEO Universiti Teknologi Swinburne, Professor John Wilson madah Kuching VR deka nyaup ngelaku Nengeri Sarawak ngagai menua luar.

    Ku iya, aplikasyen ukai semina mandangka palan pematak temuai tang bela ngelaku pekara pelajar, pemakai sereta jalai di Mengeri Kuching.

    Ba pengawa nya, John madah universiti keran mansutka mayuh agi bala graduet ke diguna industri ditu.

    “Raban pengajar enggau kus ke disedia universiti seraris enggau pinta industri di nengeri tu kelebih agi ba Industri 4.0.

    “Universiti ngembuan mayuh raban ke landik ba pengawa pansik lalu kitai deka nyaup Sarawak nyapai status menua mansang ba 2030,’ku iya.

    Bela datai Menteri Kereja Raya Dato Sri Fadillah Yusuf, Menteri Muda Nembiak enggau Lumba Datuk Snowdan Lawan, Sapit Sekretari Perintah Nengeri Datu Abu Bakar Marzuki enggau orang bukai. #UtusanBorneo

    No comments

    Post Top Ad