ASNS 2017 deka diatur kena 24 Februari ba BCCK - Berita Iban Online

Header Ads

  • Baru Nyadi

    ASNS 2017 deka diatur kena 24 Februari ba BCCK

    Dr Annuar Rapaee
    KUCHING: Pengerami Anugerah Sastera Negeri Sarawak (ASNS) 2017 deka diatur kena 24 Februari tu, ba BCCK.

    Menteri Muda Pelajar enggau Pansik Teknologi, Dr Annuar Rapaee madahka taun tu ASNS bisi nerima 35 iku ke dichalun ba semua semilan kategori tang semina enam kategori aja ti bisi chalun ke patut.

    “Anugerah Sastera Negeri Sarawak (ASNS) tu deka diatur ba BCCK kena 24 Februari , lalu dipelabaka pengerami tu deka digulu temuai ti pemadu dipebasa, Tuai Megai Menua (TYT) Sarawak Tun Pehin Sri Abdul Taib Mahmud enggau Toh Puan Datuk Patinggi Ragad Kurdi Taib.

    “Komiti Panel Akim ASNS 2017 ngemutuska enam chalun ke ulih menang kategori iya nya Anugerah Khas Bahasa dan Sastera dimenang Hamzah Hamdani; Anugerah Penulis Sarawak Genre Novel (Idris Boi); Anugerah Penulis Sarawak Genre Cerpen (Mohd Ali Salim); Anugerah Penulis Sarawak Genre Puisi (Pharo Abdul Hakim); Anugerah Penulis Sarawak Kategori Bahasa Iban (Harry Usup Umbar) enggau Anugerah Penulis Sarawak Kategori Bahasa Cina dimenang Wong Ching Ping.

    “Tiga kategori nyengkaum anugerah ke pemadu tinggi iya nya Anugerah Sasterawan Negeri Sarawak sereta Anugerah Pengarang Sarawak Genre Esei Kritikan enggau Anugerah Pengarang Sarawak Kategori Bahasa Melayu Sarawak, nadai chalun ke patut nerima gelar nya,” ku iya.

    Dr. Annuar madahka pekara nya dalam aum pengarang berita mantaika pemutus Anugerah Sastera Negeri Sarawak (ASNS) 2017 ke diatur ba bilik baum Dewan Bahasa dan Pustaka (DBP) ditu, kemari.

    ASNS iya nya projek ari baruh perintah nengeri nengah Opis Menteri Muda Pelajar, Sains enggau Pansik Teknologi, lalu DBP Pampang Sarawak nyadi sekretariat ngelanggur enggau ngatur.

    Berebak enggau tu Direktor DBP Pampang Sarawak Dr Hazami Jahari lebuh ditanya bekaul enggau kategori ke nadai chalun ke patut nyengkaum gelar ke pemadu tinggi, iya madahka pekara nya endang kala nyadi sereta nyadi mega ba renggat menua.

    Laban ba pengawa nentuka penerima gelar bala panel akim endang terit sereta nitihka standard pinta ke udah ditetapka.

    “Ambika chunto, gelar ke pemadu tinggi iya nya Anugerah Sasterawan Negeri Sarawak semina empat iku aja ke udah nerima gelar nya, kenyau ari gelar tu berengkah diatur taun ba taun1994.

    “Empat penerima Anugerah Sasterawan Negeri Sarawak iya nya niang Muhammad Bujang (1994), niang Muhammad Rakawi Yusuf (1995), Datu Dr. Adi Badiozaman Tuah (2009) enggau Jong Chai Lai ba taun 2014,” ku iya seraya madahka ASNS diatur dua taun sekali.

    Nitih ku Hazami, penetap penerima gelar pemadu tinggi tu, dipilih bepalasarka asil enggau karang ti kala dichelak ke bisi kualiti sereta mai pemansang runding raban bansa dalam timpuh diperesa.

    Nambahka nya dipilih bepelasarka pemeri enggau penyereta ba pengawa litericha nyengkaum penyulut tauka menang gelar renggat nengeri, menua enggau antarabansa sereta peranak menua nengeri tu enda ngetu ngasilka utai karang.

    Tetiap gelar nya bisi disediaka perais mata duit iya nya Anugerah Sasterawan Negeri Sarawak (Gelar pemadu tinggi) RM20,000, lalu Anugerah Khas Bahasa enggau Sastera (RM6,000).

    Penerima Gelar Penulis Sarawak Genre (Novel, Cherepan, Puisi, Esei, Kritikan enggau Skrip Drama) nerima mata duit RM4,000 lalu Gelar Penulis Sarawak Kategori Bahasa (Bahasa Iban, Melayu Sarawak, Bidayuh, Melanau, China, Inggeris enggau Orang Ulu) bulih perais RM4,000.

    Perais mata duit nya ari perintah nengeri nengah Sekretariat ASNS DBP Pampang Sarawak nyengkaum perais ke bukai. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads