Atur ke sistematik, profesional ulih nyeliah koperasi ari penanggul -->
Cari Berita

Advertisement

Atur ke sistematik, profesional ulih nyeliah koperasi ari penanggul

Admin | beritaiban@gmail.com
January 25, 2018

SIRU: Lee (tiga kanan) nyuaka pemeri ngagai siku ari penerima di Pustaka Miri seraya dikemataka Najmah (tiga kiba) lebuh program nya kilah ensana.
MIRI: Koperasi ke ditumbuh lalu nadai diatur kaban profesional sereta suah napi penyarut entara kaban deka napi penanggul.

Menteri Muda Dagang Temuai, Seni enggau Main Asal, Datuk Lee Kim Shin ngaku mayuh koperasi udah puntan laban kelalu ngiga untung.

“Enti deka numbuhka koperasi, sida patut nerima latih enggau kus ngatur pengawa sereta pekara pemadu beguna ngembuan ulah sepenemu antara bala kaban,” ku iya.

Iya mansutka jaku nya rambau Pengawa Nutup Program Lestasi Modal Insan Koperasi enggau Peluang Pembiayaan Kepada Usahawan di Pustaka Miri kilah ensana.

Ku iya, pugu pemujur koperasi bepanggai ba pengawa ngatur sistematik enggau profesional kelimpah ulah bebatak asur antara kaban.

“Aku udah suah ninga pemuntan koperasi ketegal napi penyarut dalam ba renggat ngatur pengawa sereta enda pechayaka pangan diri,” ku iya nerang.

Nitih ku iya, statistik ti dikeluarka Suruhan Koperasi Malaysia (SKM), sepenyampau 1002 buah koperasi udah direjista di Sarawak.

Iya ngaul 7.4 peratus ari semua penyampau koperasi di Malaysia sepenyampau 13,648 buah enggau kaban lebih ari 320,000 iku.

“Koperasi tu bisi puku besai syer enggau yuran ngelui RM130 juta sereta aset penyampau RM558.7 juta udah ulih mansutka pengulih ngelui RM140 juta.

Statistik tu ku iya ngayanka pengawa koperasi di Sarawak bisi penegap ari kaban enggau bidang ekonomi ti manah.

Polisi Koperasi Menua dekaka koperasi udah mansutka RM50 bilion ngagai Pemansut Kasar Asil Dalam Menua (KDNK) manggai taun 2020 dibida RM40 bilion taun nyin tadi.

“Dikena nyapai juluk tu, semua koperasi patut bejalaika pengawa chara kolektif nambahka penatai pemisi sida empu urung 5 ngagai 6 peratus setaun,” ku iya madah nyemetak.

Ba lansa ke bukai, bisi 200 iku ngulu kus diatur Maktab Koperasi Malaysia Zon Sarawak lalu iya mega udah diatur di 11 agi endur ke udah dipilih.

Berebak enggau program nya, raban seranta bela nerima pemeri ari koperasi nengah program tanggungpengawa rama korporat (CSR).

Sama bisi datai Direktor Kanan Maktab Koperasi Malaysia, Najmah Nawawi, Direktor Maktab Koperasi Malaysia Zon Sarawak, Siti Maimunah Jerni, Pemesai Pelilih Miri, Abdul Aziz sereta bala temuai dipebasa ke bukai. #UtusanBorneo