BDEWC udah tegap sereta mayuh peneleba ba sektor minyak enggau gis -->
Cari Berita

Advertisement

BDEWC udah tegap sereta mayuh peneleba ba sektor minyak enggau gis

Admin | beritaiban@gmail.com
January 25, 2018

Datuk Abang Abdul Karim Tun Abang Openg
KUCHING: Pengudah ke chakah pengelama 21 taun dalam sektor minyak enggau gis, Brooke Dockyard and Engineering Works Corporation (BDEWC) udah tegap ba mayuh bansa kereja enggau kapasiti dalam sektor nya, pia ku chairman iya Datuk Abang Haji Abdul Karim Tun Openg.

Iya  madahka Brooke Dockyard dikelala tauka diaku pengemeran ti efisyen sereta ulih besemekih dalam sektor nya berindik ari ti mujur nyendiaka lebih 30 substruktur enggau modul gawa di tasik ti mungkur 37,647 tan metrik.

Nitih ku iya, Brooke Dockyard bisi urung 400 iku pengereja pengawa lalau 99 peratus ari penyampau nya peranak Sarawak. Nambahka nya bisi 60 iku injinir, 15 QAQC personel, 110 iku pengereja pengawa bepengelandik sereta raban ukai teknikal enggau pengereja pengawa bukai.

“Dalam timpuh 21 taun ke udah, Brooke bisi nyendiaka peluang gawa sereta ngelatih peranak menua lalu nyendiaka pengidup ke meruan ngagai lebih 1,000 ruang bilik.

“Kami udah ngemesaika penyampau kapasiti ninting taun ari 8,500 tan metrik ngagai 25,000 tan metrik ba kededua Sejingkat Fabrication Yard enggau Demak Fabrication Yard ke pemadu baru. Tu bisi disikap enggau opis, gudang, bengkel, ‘fabrication table’ enggau ‘loadout jetty’.

“Nengah kapasiti enggau penau tu kami ulih bejalaika mayuh bengkah projek ari perintah sereta peribit lalu ulih besemekih enggau pengemeran besai ti ukai semina dalam sektor minyak enggau gis tang mega bepelasarka tanah enggau industri marin,” ku iya.

Abang Karim mansutka pekara nya lebuh ti bejaku ba pengawa ‘Loadout Ceremony of E6DP-A Substructure and Topsides’ ke diatur Sarawak Shell Berhad ba BDEWC Sejingkat Fabrication Yard ditu, kemari.

“Sehari tu, hari ti besai reti ngagai Brooke iya nya ngerami penembu E6DP-A enggau Loadout Ceremony’,” ku iya ti temegah ati laban Brooke udah nembuka projek ke disain enggau Shell kena 1 November 2016 ba mua niang Pehin Sri Adenan Satem ke nyadi kepala menteri maya nya.

Pengerami nya kemari udah dipenyadika Kepala Menteri Datuk Patinggi Abang Johari Tun Openg, ke sama bisi digulu Sapit Kepala Menteri ti mega Menteri Pemansang Infrastruktur enggau Perengka Pengangkut Tan Sri Datuk Amar James Jemut Masing; Menteri Muda Perengka Pengangkut Datuk Dr Jerip Susil, Sekretari Perintah Nengeri Tan Sri Datuk Amar Mohamad Morshidi Abdul Ghani enggau ke bukai.

Kelimpah ari nya, Chairman Shell Malaysia Datuk Iain Lo lebuh bejaku madahka  bisi dua penyulut ke dijapai iya nya nembuka Projek onshore E6 Field development  dalam timpuh 12 bulan enggau 10 bulan.

Nambahka nya ku iya, diaku laban ke bisi penau sereta pengulih ba teknikal lalu pengereja pengawa kering sereta tegap ke gawa lebih 13 bulan, ngerikod 1.2 jam, gawa nadai bebadi.

“Kerejasama entara  Brooke Dockyard enggau Shell ti manggai 30 taun, aku lantang ati meda pemansang kerejasama kami ti mai penyulut.

“Peranak Sarawak ti udah sama enggau ngambi bagi ngemujurka projek sereta ngelui ari ke dipelaba nyengkaum ba bajet, timpuh, pengelikun enggau kualiti. #UtusanBorneo