Header Ads

  • Berita Tebaru

    Begunan opis RTM Miri kena tanah tusur

    Kapt. (PA) Mohd Hazle Shah Bin Abd Hamid
    MIRI: Begunan opis Radio Televisyen Malaysia (RTM) ba Jalai RTM ditu ke beumur urung 46 taun bisi kena pangka tanah tusur berindik ari gaya hari diatu ke berunggu ujan.

    Pemesai Opis Penyaga Periman Malaysia (APM) Pelilih Miri Kapten (PA) Mohd Hazle Shah Abd Hamid madah, Palan Penyaga Operasyen Pelilih (PKOD) nerima kangau tasah pasal penyadi nya ari pemesai Opis Pengeluar Program RTM Miri urung pukul 10.13 pagi kemari.

    “Kaban APM meresa pendiau beguna nya lalu dipeda amat bisi bekau tanah tusur ba belakang opis nuju ngagai parit.

    “Bisi mega bekau merekah ba tisi dinding begunan nya,” ku iya madah ngagai media ditu emari.

    Nitih peneang, gaya tanah ke belubang kala nyadi sebedau tu tang ulih adu lalu penyadi tu kedua kena Hari Enam ke udah bisi tanah tusur ngujungka bisi bekau merekah ba dinding.

    MEREKAH: Dinding begunan Opis RTM Miri dipeda bisi merekah bekau ari penyadi tanah tusur ba endur nya.
    Penyadi nya mega ngujungka tiang tiang lampu enggau tiang kamera litar tertutup (CCTV) tumbang udah nya pagar ba belakang tumbang laban tanah bepasir enggau hari ke berunggu ujan.

    Udah nya, siku pemesai enggau tiga staf APM diuluka Leftenan Muda (PA) Azuan Kamin diasuh meresa pendiau begunan nya kemari. #UtusanBorneo

    No comments

    Post Top Ad