Header Ads

  • Berita Tebaru

    BHF 10 ‘Pulai Ke Borneo’ deka diatur di Sarawak

    NGANGKATKA MAIN ASAL DI MENUA LUAR: Pesereta renggat kepenudi BHF 2017 ti besemekih ke gelar Mr&Ms Borneo 2017 begambar ngena ngepan asal bansa diri empu ba mua ofis dagang temuai di London.
    KUCHING: ‘Borneo Hornbill Festival’ (BHF) udah datai ba taun kesepuluh penumbuh pekit nya taun tu, lalu dikena ngelai nya, taun tu pekit BHF deka diintu ba Sarawak. Pekit taun tu ti berambai jaku ‘Pulai Ke Borneo’ agi mengkang ngembuan tuju ti sama iya nya deka ngangkatka ngepan sereta main asal komuniti ti nguwan pulau Borneo.

    “Taun tu, kami bela udah setuju deka ngatur pekit BHF di nengeri Sarawak. Taja pia, sistem tauka format pekit agi mengkang baka ngelama tu.

    AUDISYEN: Siku ari pesereta ti benung audisyen ungkup pekit BHF 10 ‘Pulai Ke Borneo’.
    “Audisyen udah belabuh dipejalai ti bepun ari Sibu kena Hari Enam (13 Januari) tu tadi. Nangkan ke nya di Kuching seharitu (14 Januari) lalu 20 Januari di Palan Transformasyen Mengeri (UTC) Miri. Semanjai dua hari udah ngaga audisyen di dua palan ti bebida, sambut raban nembiak endang chukup manah,pia ko Sapit Direktor BHF Ricky Kimwah lebuh dikerandau pengarang berita di UTC Kuching kilah ensana.

    FINALIS: Semua finalis BHF 9 begambar ungkup kenang enggau Sapit Direktor BHF Ricky Kimwah (duduk).
    Ku Ricky madah, semanjai sepuluh taun pekit tu udah digaga, mayuh pesereta pekit ti nyadika tu palan endur nerenak pengerindu bekaul main asal bansa diri. Tu ngayanka batang tuju pekit tu udah nyapai juluk iya nya deka nyadi pelasar ti engkeman dikena ngiri penemu bekaul main asal ngagai raban nembiak seraya nentuka sida seruran negika penatai asal bansa diri.

    BAJIK: Siku bansa ribai ti udah datai ngulu Pekit BHF renggat kepenudi 2017 di London begambar enggau seraban indu dara ti ngena ngepan Orang Ulu.
    “Batang tuju BHF tu iya nya deka terus ngenanka main asal komuniti di Borneo. Tu pelasar ti manah dikena nerenakka pengerindu ngagai penatai asal diri seraya mandangka pesaka asal ti bisi dikembuan kenyau ari aki ini kitai kelia, ko Ricky nandu.

    Taun nyin kemari, BHF udah nerima sambut sereta puji ari temuai ti datai ngulu pengerami tu ba renggat kepenudi, iya nya pekit ti digaga di London. Entara temuai dipebasa ke bisi ngulu program renggat kepenudi tu iya nya waris Brooke, Jason Brooke mega bisi datai meda pengeraja bansa asal di Sarawak enggau Sabah ti dipandang di Regent Park University, London.

    Gelar Mr Borneo 2017 ke digaga di London udah dipenggi Nigel Marudin ti penatai asal ari Kampung Keramat, Beluran, Sabah. Lalu gelar Ms Borneo 2017 udah diempu indu dara bansa Bidayuh ari Bau iya nya Odleen Catherny.

    Direktor BHF Agustus Sapen madah, nyerumba pekit tu ti dilangkar digaga ba Kuching kena taun tu, dikearap mayuh raban nembiak rebak baru sama meri sukung bela enggau besemekih seraya ngetanka main asal bansa diri empu.

    “Aku ngelalau raban nembiak bela datai ke audisyen di palan ke udah ditetap ke besemak endur kita diau.

    “Kelimpah ari nya, aku mega minta raban nembiak ti udah nyikap diri enggau pekit BHF taun tu ngambika udah ngerunding nama bagi pansik bekaul komuniti kita ti deka diayanka ngagai bala akim lebuh pekit nya ila,ku Augustus ngelansa lebuh dikerandau pengarang berita bedau lama. #UtusanBorneo

    No comments

    Post Top Ad