Header Ads

  • Berita Tebaru

    Binyo ulih nyadi pengeluar pisang skala besai di nengeri tu

    NGAMATKA SEMAYA: Rundi (tengah) nyuaka chek bantu penyampau RM100,000 ngagai Tuai Rumah Irai, ngarika sida serumah, rambau atur pengawa kilah ensana.
    BINTULU: Kandang menua Binyo di Pelilih Sebauh bisi pengulih besai dikemansang projek nanam komoditi pisang lalu ngangkatka menua nya dudi hari nyadi entara pengeluar pisang dalam skala besai di nengeri tu nyema projek nya dipejalai, pia ku Menteri Bekal Ai enggau Elekterik Menua Pesisir Sarawak, Dato Sri Dr Stephen Rundi Utom.

    Ku iya, pansik silik deka dipejalai raban bekaul dikena nentuka tikas pengami tanah di kandang menua nya ngambi dikemansang enggau nanam komoditi pisang beskala besai.

    “Enti sema projek nanam pisang tu mujur ila, iya dipelaba deka nguntungka peranak di menua nya laban sida ulih ngulihka penatai pemisi nengah projek nya,” ku iya.

    Rundi mansutka jaku nya rambau aum pengarang berita ti diatur pengudah ngulu Aum Kaban Komiti Parti Pesaka Bumiputera Bersatu (PBB) Pampang Kemena ti diatur di sebuah hotel tebilang ditu, kilah ensana.

    Iya andal amat projek nanam pisang ulih mansutka penatai pemisi raban orang bumai di kandang menua Binyo sereta kandang menua besemak ke bukai.

    Ku penemu Rundi, tu ila ukai semina ngangkatka Binyo nyadi menua pengeluar pisang pemadu besai, tang deka mantu peranak dia nyual komoditi pisang sereta mantu sida ngemansangka pemakai ari komoditi nya lalu meri penguntung ngagai sida.

    Rundi ke mega Kaban Kunsil Nengeri (ADUN) Kemena madahka, kandang menua Sebauh endang bisi pengulih besai dikemansang enggau pengawa betanam betupi baka buah, sayur, nupi jelu laban iya nerima peminta tinggi ke diatu enggau dudi hari.

    “Bisi peminta tinggi ngasuh Pelilih Sebauh ti semak enggau Bintulu enggau Taman Perindustrian Samalaju (SIP) enggau penambah penyampau tubuh peranak diau mendam dia tentu deka ngemai ngagai pengerembai industri pemakai kelebih agi bekal pemakai baka sayur, buah enggau asil jelu tupi dikena nampung peminta peranak,” ku iya nerang.

    Nya kebuah ku iya, perintah endang ngemeratka pengawa ngangkatmanah enggau ngaga perengka guna enggau mega infraastruktur kelebih agi sambung jalai alun enggau bekal ai sereta bekal kuasa karan dipejalai berenggat pulaika pengelantang peranak di Pelilih Sebauh ke baru tama ngagai taun kedua nyadi pelilih menua.

    Enda ulih disakal ku iya, projek pemansang endang begunaka timpuh panjai laban iya enda ulih dipejalai berebak, tang tetap deka dipejalai laban perintah seruran ngemeratka pengelantang rayat kelebih agi sida ke diau di kandang menua ulu.

    Ba lansa bekaul, Rundi mega bisi nyuaka agih b e lanja penyampau RM100,000 ngagai peranak Rumah Irai Gasing, Sungai Binyo dikena sida bejalaika program nyengkaum ngemanahka struktur rumah panjai nya. #UtusanBorneo

    No comments

    Post Top Ad