Header Ads

  • Berita Tebaru

    Chairman PBB Piasau: Mandal Kanan Presiden ditan, Mandal Presiden diberi ngagai orang baru

    Sardon Zainal
    MIRI: Kaban Parti Pesaka Bumiputera Bersatu (PBB) dekaka pangku pengawa Mandal Kanan Presiden sida ditan maya konvensyen parti ti deka diatur di Kuching dalam bulan baru lalu pangku pengawa Mandal Presiden diberi ngagai orang baru ngambika ngemudika parti napi empas gelumbang pemansang politik udah tu di Sarawak.

    Chairman PBB Pampang Piasau, Kunsilor Sardon Zainal madah bala ketuai renggat baruh deka meda pengawa besilih kuasa lanchar sereta mai asil ti manah ba konvensyen PBB ti deka ngenegapka pengawa ditegika parti.

    “Tanka pangku pengawa Mandal Presiden Kanan PBB lalu tejuka orang baru mangku pengawa mandal presiden maya konvensyen parti ke deka diatur di Kuching dalam bulan baru,” ku Kunsilor Sardon madah ngagai The Borneo Post kemari.

    Nitih ku Sardon, pangku pengawa Mandal Kanan Presiden patut ditan lalu tejuka semina pangku pengawa mandal presiden antara raban Bumiputera enggau Pesaka aja.

    Ku iya, nengah pengawa ngetanka pangku pengawa deka nadai mayuh diperebut bala chalun ti bepengulih bediri minta pilih ba pangku pengawa, deka diperati engkeman sereta tegap agi.

    Ku iya, kitai ketuai renggat baruh enggai meda sebarang ‘klik’ antara kaban parti laban tu enda manahka atur pejalai enggau pengawa ditegika PBB.

    Sardon merambu pangku pengawa mandal presiden PBB diberi ngagai Datuk Abdul Karim Hamzah enggau Dato Sri Fadillah Yusof.

    “Seduai tu, Karim enggau Fadillah bisi peneleba meri seput baru ngagai kuing parti napi gelumbang pemansang politik udah tu sereta ngenegapka pengawa ditegika parti,” ku Sardon nerang silik.

    Pekara tu timbal ari renggat baruh parti ti dekaka ketuai baru bisi peneleba sereta dikelala rayat di Sarawak, sida patut diberi peluang ngisi pangku pengawa mandal presiden, ku iya nambah.

    Bekunsika penemu ngagai perspektif bala ketuai renggat baruh ba konvenysen PBB di Kuching iya nya Chairman PBB Pampang Pujut, Abu Bakar Amit, ke alai kaban parti di renggat baruh nganti pemutus ebsai digaga maya konvensyen nya.

    Ku iya, PBB N74 Pujut bisi besai pengarap enggau mandat baru ari semua deligit sereta pemerati rambau Kepala Menteri Sarawak Datuk Patinggi Abang Johari Tun Openg ke mega Presiden PBB, ke alai kededua pangku pengawa, presiden enggau sapit presiden enda deka diperebut.

    “Semua pengari enggau pemerati setuju sereta dekaka penegap parti deka terus nangkup peneka peranak Sarawak,” ku Abu Bakar nampung silik.

    Nitih ku Abu Bakar, nengah pengarap nya deka dibai maya konvensyen sereta deka dipesetuju, udah nya deka nampung atur pengawa enggau pemansang Sarawak nyadi nengeri ti progresif agi datai ba taun 2030.

    Kami, PBB Pujut nyukung Kepala Menteri minta ngambika ngembuan parti ti kering sereta dinamik agi dikena nangkup peminta Sarawak, ku iya nambah. #UtusanBorneo

    No comments

    Post Top Ad