Header Ads

  • Berita Tebaru

    Chara ngatur pemansang infrastruktur patut diubah, ku Abang Johari

    NUNDA KONSEP BERUMAH DI MALDIVES: Abang Johari nerima paung Sukun ari siku pemesai korporat Abang Dato Paduka (Dr) Ariffin Abang Bohan (kanan), lalu dikemataka Abang Wahap.
    Diatu perambu pemansang bisi nyelai, pekara rampa menua enda tau enda dikemerat ngambika seruran gadung dipeda.

    KUCHING: Daya Builders, Housing Development Corporation (HDC) enggau Opis Kunsil Dewan Bandaraya Kuching Utara (DBKU) diasuh ngaga langkar perambu ke nyelai mimit ari pemansang ke digaga orang bukai, alai pemisi kerejasama ngaga pemansang infrastruktur sereta pengawa berumah digaga di entara rampa menua.

    Kepala Menteri Datuk Patinggi Abang Johari Tun Openg madah tu entara penemu tauka runding baru ngaga rumah, alai pengawa berumah dipegulai enggau rampa menua ke gadung.

    “Tu penemu ke baru, alai pengawa ngaga rumah digulai enggau rampa menua, alai kitai ukai semina beratika infrastruktur aja tang nyengkaum ngemeratka pekara rampa menua.

    “Pemisi pengawa berumah mungkur ngemeratka rampa menua gadung, sama betatika pengerai mensia mayuh, laban kitai ukai semina rindu meda gadung, tang rampa menua ke gadung nya mega meri kitai oksigen sakang penyakit ke chukup mayuh,” ku iya.

    Iya madah munyi nya lebuh bejaku ngepunka atur pengawa #MA2018 Nanam Pun Kayu@Muara Tebas, ti di atur ulih DBKU, Daya Builders enggau HDC semak ditu, kemari.

    Penemu baru bansa tu ku iya, ulih digaga begulai sereta bekerejasama enggau Opis Kunsil Bandaraya Kuching Utara (DBKU), alai sitak Muara Tebas tu baruh bungkur DBKU, siti sitak ke pengeraja enggau rampa menua nyengkaum genturung pendiau mensia mayuh.

    “Tu sebagi ari pemansang Perintah Menua ke sitak Muara Tebas, laban iya besambung enggau Bako, lalu nambah enggau nya, kitai udah bisi jematan ti dikemansangka di Bako, lalu ari sepiak tu (Muara Tebas) disambung ngagai Bako sereta ulih mega terus ke Kpg Buntal.

    “Perundingka sitak tu gadung, lalu udah nya temuai mega ulih lalu ke Taman Negara Bako, nya sebagi ari pegulai ekonomi ke sitak tu, lalu nambah enggau nya, komuniti ditu pan ulih bejualka produk digaga sida iya empu ngagai temuai ke kitu,” ku iya.

    Abang Johari ti mega nyadi Menteri Pemansang Nengeri enggau Rampa Menua madahka pemansang bansa tu, pemansang ke baru.

    “Kitai ngena promosyen digital, iya nya ‘Virtual Reality’(VR),alai temuai ulih ngambi gambar pemayah rampa menua kitai, lalu di ‘upload’, orang bukai pan deka ‘download’. Nengah chara nya, kitai ulih ngangkatka ekonomi kitai, nya chara transformesyen kemaya hari tu.

    “Iya mega sebagi ari program transformasyen alai perintah ngemansangka rampa menua nyengkaum genturung pendiau.

    Iya madahka, sitak Muara Tebas, sebuah sitak ke chukup manah, alai Perintah ngembuan perambu deka ngemansangka sitak Muara Tebas ngipak pemansang nyerumba ‘Bako Peninsular Development’.

    “Tu deka meri siti chura ke baru dalam pemansang kitai, alai Muara Tebas sebuah sitak ke ngembuan tanah ke bechampur, tanah rau enggau tanah kering.

    “Nya alai, kitai napi penanggul deka ngemansangka sitak tu laban kos ke kelalu besai. Tang kitai patut bisi jalai laban enti diperatika sitak tu sitak ke gadung, kitai enggau ngaga pengawa salah baru laban mengeri bukai di dunya tu, kelalu mayuh batu bata,” ku iya.

    Kadang-kadang ku iya, kitai meda pun kayu nyerummba rumah kondominium, ke tinggi-tinggi tang Bandaraya Kuching, kitai enda tau meda bisi pemela ari rumah tinggi sereta rumah konkrit.

    “Kitai ngena rampa menua nyadi chara baru ari sukut pengawa arkitek sereta arkitek lanskap, alai kitai rumah ke digaga sama imbang enggau rampa menua,” ku iya.

    Di sebuah pulau benama Maldives ku iya, dikemansangka enggau rumah dalam sitak gadung, bisi jalai mit lalu sida iya diau di genturung pendiau ke dikelingi ulih pun-pun kayu gadung, ke enda ditebang.

    “Bepelasarka konsep nya, mayuh temuai ari menua luar ngelawa Maldives, laban enti nitih Maldives nadai endur ke ulih matak ati mensia mayuh kia, tang semina tasik sereta rampa menua gadung.

    “Temuai kia laban ba penemu sida iya, semina deka eksasais, dalam rampa menua gadung. Bisi jalai tang jalai batu,ke manah nedur bejalai kaki, alai penemu pengawa berubat, ngindik batu-batu tu manah ke pejalai darah dalam tubuh kitai,” ku iya, lalu nandu baru madahka kitai belajar ari menua ke maji tang anang ngaga pengawa ke salah kelebih agi lebuh menua tu bepngeraja enggau rampa menua.

    Abang Johari ti mega nyadi Menteri Wang enggau Perambu Ekonomi nandu baru madahka iya nyukung pengawa DBKU ngemansangka pun-pun kayu ba baruh sitak pegai sida iya.

    “Diatu, Perintah Menua Sarawak benung deka ngaga kerejasama enggau Finland dalam pekara kampung menua tu, alai saintis Finland deka bekerejasama enggau saintis kitai nanam pun-pun kayu ke ulih tumbuh enggau jampat kelebih agi gaya mua hari kitai ke muakka tropik,” ku iya.

    Di Finland, ku iya, pun kayu sida iya enda entu besai, umbas iya besai tang pengelama sida iya nanam sepun dalam kandang 70 taun laban gaya mua hari sida iya ke-4 musin.

    “Kitai ditu, pun kayu enti udah 6 taun umbas iya besai, tau di tebang, lalu nyadi ‘feed stock’ ke industri kayu.

    “Di sitak menua kitai ditu, enti nanam pun kayu, ujan chukup, ai chukup, mata panas chukup, chukup tu aja ngasuh pun kayu galak tumbuh. Kitai nanam pun kayu, dalam kandang 5,6 taun, iya nyadi besai, baruh pun kayu tau alai berumah, nyelai ari Eropah, tauka menua Barat,” ku iya.

    Sama bisi enggau ngulu atur pengawa nya kemari, Datuk Bandar DBKU, Datuk Abang Abdul Wahap Abang Julai. #UtusanBorneo

    No comments

    Post Top Ad