Header Ads

  • Berita Tebaru

    Dagang manyi kelulut balat nguntung

    Datuk Seri Rohani Abdul Karim
    PUSA: Dagang manyi kelulut majak dikerinduka raban pedagang ba nengeri tu laban iya muntang dikereja sereta enda ngemedis, tambah mega taun nyadi sebengkah industri ke balat nguntung.

    Menteri Pemansang Orang Indu, Ruang Bilik enggau Raban Bansa, Datuk Seri Rohani Abdul Karim madah, mayuh bala pedagang diatu angkat ngemansutka madu ti datai ari mayuh chap.

    “Berebak enggau nya, pansik pasal industri pemungkal enggau pengujung  kelulut tentu udah bepun dipejalaika lalu lebih numpu ngagai sukut biologi, pengerai enggau pemanah dipakai,” ku iya rambau nutup Program Lestari Modal Insan enggau Licha Nupi Kelulut : Nyaga Kualiti enggau Penau Dagang Besai diatur Maktab Gerempung Kerjasama Malaysia Zon Sarawak bepalan ba Dewan Kampung Kalok, Pusa ditu kemari.

    Iya madah, pansik mega mandnagka urung lebih 500 spesies manyi kelulut serata dunya.

    Entara menua enggau bungkur Nusantara ke dikelala ngembuan manyi kelulut iya nya Indonesia (37 spesies), Thailand (20), Myanmar (sembilan), Vietnam (lapan), India (tiga), Taiwan (satu) enggau ba Malaysia lebih ari 35 spesies.

    “Pansik dipejalaika MARDI mega tetemuka Malaysia ngembuan mayuh bansa kelulut dibanding enggau menua Asia ke bukai.

    “Berebak enggau nya, kitai beratika mayuh gerempung ke udah ditumbuh dikena nempa semangat kerejasama ba raban pengemeran manyi kelulut kelimpah ulih ngemanahka agi kualiti manyi kelulut ba Malaysia,” ku iya.

    “Chunto Gerempung Pedagang Manyi Kelulut Malaysia enggau ba renggat nengeri mega enda tinggal numbuhka gerempung kediri baka ba Johor, Terengganu enggau Pahang. Pia mega bisi laman web ti mandangka penerang ke chukup manah bekaul enggau manyi kelulut baka Kelab Lebah Kelulut.Com,” ku iya.

    NUTUP PROGRAM: (Ari kiba) Bujang, Friday, Rohani sereta bala bukai rambau pengawa nutup program nya ditu kemari.

    Rohani ke mega Kaban Parlimen Batang Lupar madah,  industri tu ulih nyungkak penatai pemisi raban pedagang enggau menua nengah mayuh produk ke ulih digaga ukai semina madu manyi aja tang produk bukai baka propolis (perekat sarang manyi, pollen (debunga), enggau royal jelly (tusu manyi).

    “ Produk-produk ke digaga manyi chukup manah sereta nyadi produk lke bekualiti lalu bisi bendar penau ngerembai enggau jampat.

    “Kelimpah nya, berebak enggau pengawa ngemansutka produk besai manyi, aktiviti tambah dalam industri tu mega ulih nyungkak penatai pemisi.

    “Tu nyengkaum nyendia sereta meri perengka dikena nupi manyi baka haif tauka sarang manyi, lebah, meri indu manyi, kereban gari enggau perengka ke diguna maya pengawa ngemansutka produk manyi.

    “Industri tu mega dipelaba ulih nyungkak sektor dagang temuai lebih agi bekail enggau pekara pelajar enggau pengerai.

    “Tu dipeda ari sukut rega iya, madu manyi kelulut dikategori nyadi sebengkah ari madu ke chukup berega laban penyampai asil iya enda mayuh tang bekualiti laban manyi kelulut ngambi sereta ngasilka madu ari perengka utai tumbuh ke bekualiti aja,” ku tandu iya.

    Ku iya mega, ba Sarawak, penau pengawa nupi kelulut tu ungkup iya mansang chukup tinggi.

    Menua kampung tropika Sarawak mayuh diuan bansa manyi kelulut ke manah lalu nadai ba menua bukai.

    Manyi kelulut tu mega ulih ngasika madu ti manggau dua nyentuk empat kali lipat anti oksidan ke manah ngagai tubuh kitai mensia.

    “Mayuh agi sitak ba Sarawak ke ulih dikemansang nengah industri nupi manyi kelulut laban nengeri tu ngembuan pengaya utai tumbuh ke ulih dikena ungkup industri tu.

    Tu nyengkaum asil-asil kayu endur ngaga sarang utai tupi manyi kelulut ba nengeri tu agi tubah mayuh lalu rega iya mega jauh murah dibanding enggau ba Semenanjung.

    “Entara piak ke mujur dalam industri nupi kelulut  tu iya nya RH Bee Farms Sdn Bhd.

    “Palan ngaga madu kelulut ke bepalan ba Jalai Upper Lanang, Sibu tu mega penginang manyi kelulut ke pemadu besai ba Malaysia lalu ngembuan lebih lebih 4,000 koloni lalu takah sekilometer kebun ngambi awak sejam pejalai tauka ngembuan pemesai urung 8,000 hektar,”ku tandu iya.

    Sama bisi datai ba pengawa nya, Residen Bagi Menua Betong, Friday Belik, Pemesai Kaunsil Pelilih Pusa, Bujang Budin sereta ke bukai.

    Berebak enggau nya, Rohani bisi limpang ngabas dua iku temuai Opis Pengintu Pengelantang Pendiau Raban Bansa (JKM) ke endang penerima bantu orang tua (BOT) ba Pusa. #UtusanBorneo

    No comments

    Post Top Ad