Header Ads

  • Berita Tebaru

    DBOS benung beratika pinta lon bekaul projek pemansang nengeri

    Datuk Patinggi Abang Johari Tun Openg
    KUCHING: Bank Pemansang Sarawak tauka DBOS diatu benung berati sereta mansik sekeda peminta lon ari ejensi tauka kompeni ke bisi bekait enggau perintah ba pengawa deka ngaga projek pemansang di menua tu.

    Kepala Menteri Datuk Patinggi Abang Johari Tun Openg madah, DBOS, sebuah bank kedua ke di empu ulih Perintah Menua (udah Sabah) udah berengkah bejalaika pengawa operasi komersil bank nya kemari di opis bank nya di tingkat Dua, Menara SEDC, Ithmus ditu.

    “DBOS nerima mayuh peminta lon tang semua peminta nya ari ijinsi tauka kompeni ke bisi bekaul enggau perintah (GLC) ke benung diansik diatu.

    “Penyampau lun nya bepanggai ba deposit ke bisi dalam bank kitai enggau projek ke deka dikemansangka ulih ejensi tauka kompeni ke ngelun nya.

    “Tang projek ke deka dikemansangka, enda tau enda bisi rega komersil sereta bisi peluang ngulihka penguntung ngagai kededua piak,” ku iya madah ba aum media pengudah abis atur merekat pemuka opis nya ditu, kemari.

    Ba atur pengawa nya kemari, Abang Johari mega meri kelala lambang bank nya, lalu ditangkan enggau ngepunka laman web bank nya, dbos.gov.my.

    Abang Johari ti mega nyadi Menteri Wang enggau Perambu Ekonomi madah pemun operasi DBOS kemari, sebuah bank ke diempu ulih Sarawak seratus persin, ulih ngambi deposit ari Perintah Menua sereta ari kompeni ke bisi kaul enggau Perintah jemah ila.

    “Pemisi bank tu, iya ngulihka Sarawak mayar kediri projek ke bisi penguntung baka Metanol, ke muntang ngulihka lun,” ku iya.

    Entara projek bukai ke dibayar ulih bank tu, iya nya projek pemungkal infrastruktur nyengkaum ke bisi bekait enggau Internet, lalu sebagi nya ari projek bekait enggau sistem pengangkut.

    DBOS mega nyendiaka lun ke projek pemansang dalam pampang kuasa ke ulih dikena baru, industri minyak enggau gis, nyaga pengerai enggau pengawa betanam betupi moden.

    DBOS dipungkal kena 11 Mei 2017, lalu ngepunka operasi komersial sida iya seharitu, enggau modal bebayar manggai urung RM500 juta.

    Sama bisi enggau ngulu muka opis nya kemari, Menteri Wang Kedua Dato Sri Wong Soon Koh ti mega nyadi Menteri Dagang Entarabansa enggau E-Dagang enggau Menteri Muda di Opis Kepala Menteri (Hal Ehwal Korporat), Abdullah Saidol.

    Chairman DBOS, Tan Sri Morshidi Abdul Ghani enggau Ketuai Pegawai Eksekutif DBOS, Sim Kheng Boon sama bisi bela ngulu atur pengawa nya begulai enggau (lembaga pengarah) bukai, Datu Laura Lee Ngien Hion, Dato Sharkawi Alis, Christopher Adrian enggau Ho Swee Huat. #UtusanBorneo

    No comments

    Post Top Ad