Header Ads

  • Berita Tebaru

    DCCI muji pemujur perintah mutar isu ditapi pekebun mit

    Datuk Amar Douglas Uggah Embas
    MPOB kala ngaga pemutus deka ngetuka atur ngeluar pala tanah.

    KUCHING: Balai Dagang enggau Industri Dayak (DCCI) meri puji ngagai sapit Kepala Menteri Datuk Amar Douglas Uggah Embas sereta perintah ketegal ti udah nyaup mutarka isu orang bekebun mit sawit ke nadai pala tanah.

    Presiden DCCI Datuk Joseph Salang Gandum madah iya bisi madah ngagai Uggah ke mega Menteri Betanam Betupi Moden, Tanah Adat enggau Pemansang Kandang Menua ba sentang isu nya lalu berasai lantang pengudah ulih diputar enggau lengkas.

    “Ketegal nya, kitai meri puji ngagai Sapit Kepala Menteri enggau Perintah,” ku Salang rambau randau nyerumba Makai Lemai Genap 15 taun DCCI malam ensanus.

    Diatu Ku Salang, Malaysian Palm Oil Board (MPOB) udah ngubah pemutus dulu agi ari tu ti deka ngetuka atur ngeluar pala tanah ngagai orang bekebun mit.

    Iya netapka DCCI ukai gempung politik lalu seruran meratka pekara ke bekaul enggau Tanah Adat Bansa Asal Dayak.

    Iya nambah sekeda kaban kunsil besai DCCI bisi ba dalam komiti ti ngaga ubah ba Kanun Tanah Sarawak ke disadang dibantaika ba DUN bulan Mei tu ila.

    Salang mansutka jaku nya maya iya enggau Penyanding Penemu DCCI Tan Sri Datuk Amar Leonard Linggi Jugah sereta Tan Sri Datuk Amar Leo Moggie nyaut tanya ari kaban gerempung sentang tanah NCR.

    Ba randau nya Linggi bekunsi penau sentang chara Dayak ulih ngambi bagi ba ekonomi digital lalu Moggi bejaku sentang pengeran deka meda mayuh agi Dayak ngerembaika dagang sida ngagai renggat entarabangsa.

    NYADI KENANG: Salang (lima kiba) enggau Kilat (empat kiba) beganbar enggau sekeda kaban DCCI.
    Chairman Pengatur Pengawa ke mega Sapit Presiden DCCI Kilat Beriak madah makai lemai nungkatka rambai jaku ‘Embracing Strategic Technology’ diatur enggau tuju ngintu genap 15 taun penumbuh DCCI kenyau ditumbuh kena 11 January 2003.

    Ku iya DCCI diatu udah majak tegap lalu udah bisi 800 iku kaban.

    Ba pengawa nya, semua ke datai jenuh enda lama (2 minit) dikena meri basa sereta ngingatka ex-sapit presiden Tan Sri Celestine Ujang ke udah midang Hari tiga tu tadi. #UtusanBorneo

    No comments

    Post Top Ad