DE ngenyampatka pemansang nuju ekonomi ke maju, ku Abang Johari -->
Cari Berita

Advertisement

DE ngenyampatka pemansang nuju ekonomi ke maju, ku Abang Johari

Admin | beritaiban@gmail.com
January 24, 2018

Datuk Patinggi Abang Johari Tun Openg
KUCHING: Modal sereta pengelandik sama bisi pemerat nyingkang bejalai ngemansangka ekonomi digital (DE) jemah ila di Sarawak, alai Sarawak betatika ekonomi menua tu diangkatka ngagai tangga ekonomi, nengah chara ngemansangka DE, ku Kepala Menteri Datuk Patinggi Abang Johari Tun Openg.

“Dunya diatu nyau besambung ari menua siti ngagai menua siti sereta ngena chara digital. Kitai enda tau enda nitih singkang sereta sambung nya, lalu ngereja pengawa kitai ngena data sereta pemadah ke baru (up-to-date),” ku Abang Johari.

Iya madah munyi nya lebuh bejaku ngepunka Minggu Injinia Entarabansa (International Engineering Week tauka IEW) 2018 di Palan Konvensyen Borneo Kuching (BCCK) ditu, kemari.

Iya nandu baru madahka, pemoden dunya kemaya hari tu pan ngujungka kitai diau dalam kandang dunya digital, sereta berindup dalam rampa digital.

“Sarawak ngembuan mayuh pekara ti ulih diberi tauka disediaka ulih menua tu ngaul DE, baka ngemansangka rebak baru, makit ke ngaul digital nengah internet sereta palan sadung (distribution hub), nyengkaum nyendiaka (hosting of server farms tauka palan server?) bepelasarka pemisi kuasa dikembuan menua tu,” ku iya.

SARAWAK BESEDIA NGAUL DIGITAL: Abang Johari (dua kanan) nyuaka tepa ngagai chairman Tenaga Nasional Berhad (TNB), Tan Sri Leo Moggie anak Irok ke nyadi speaker ba IEW 2018, kemari. Sama bisi dalam gambar, Awang Tengah (tengah) enggau Masing (kanan).

Abang Johari ti mega nyadi Menteri Pemansang Mengeri enggau Rampa Menua nandu baru madahka Perintah Menua Sarawak nemu Perintah enda patut nanam pukuk terus ke dalam DE, ketegal pekara tu jampat berubah nitihka idar jeman sereta penanggul ke ditapi ari pemerat tu besai endar.

“Enti nitih, rampa digital tu patut digaga tauka dikemutar ulih pampang swasta ke tau ngasuh sida iya besemekih enggau pangan diri sereta ngena pengelandik inovasi sida iya.

“Pengawa Perintah Menua Sarawak, semina nyendiaka pemansang ke DE nengah pampang swasta. Taja pan Perintah enti nitih, sigi seruran nyukung ngaga pemungkal infrastruktur ke telegraph enggau kerita, Perintah mega deka nyukung ngaga pemungkal infrastruktur ke data digital.

“Sarawak sigi betatika pekara digital bansa tu, nya kebuah menua tu sigi bebendar ngaga pansik sereta inovasi, sereta pemerat kitai di Sarawak sigi patut beratika kuasa alternatif bukai,” ku iya.

Ba lansa bukai, iya madah dunya diatu beratika ngena minyak fossil dalam kandang 150 taun tu ke udah, lalu enti diperatika, dunya betatika empas minyak fossil ba rampa menua.

“Jaku ke dikena orang kemaya hari tu, iya nya kuasa gadung,” ku iya.

Kelimpah ari nya, iya madah, Sarawak mega benung beratika sel minyak hidrogen sereta ekonomi hidrogen, nyangka ketegal menua tu ngembuan pemisi ai ke mayuh ari kuasa hidro.

“Kuasa hidrogen diatu dipeda ngembuan pelang ke besai ke ulih dikena dalam pengangkut. Bisi skop ke manah ke pemansang kuasa gadung di Sarawak laban penyampau mensia ke bisi di menua tu, enda kelalu mayuh kena kitai ngulihka bungkur penuh kuasa hidrogen tu,” ku iya.

Iya nandu baru madahka Sarawak udah sangkai ba mua pintu jeman digital, enggau pemisi industri kuasa diangkatka datai ke jemah ila, nyengkaum pemisi teknologi moden.

“Kami (Sarawak) betatika menua tu nyadi sebengkah ari transformesyen digital, ke dipeda deka ngenyampatka pemansang, nuju ekonomi ke maju.

“Bepelasarka pekara nya, Sarawak deka ngemanahka agi sistem pelajar dalam ngemansangka rebak baru lalu dalam timpuh nya mega, meransang mensia mayuh ngena teknologi ICT (Teknologi, Komunikesyen enggau Pemadah) nyengkaum ‘Artificial Intelligence enggau Fintech.

“Iya deka meri penguntukg ke besai, ke muka peluang dagang sereta servis, nyengkaum nyendiaka pengawa begaji besai ngagai semua rayat Sarawak,” ku iya.

Sama bisi enggau ngulu atur pengawa nya kemari, Sapit Kepala Menteri, Tan Sri Datuk Amar James Jemut Masing, Datuk Amar Awang Tengah Ali Hasan, Menteri Kereja Malaysia, Dato Sri Fadillah Yusuf, Speaker Kunsil Nengeri Datuk Amar Awang Asfia Awang Nassar,enggau Sekretari Perintah Menua Sarawak, Tan Sri Datuk Amar Morshidi Ghani.

IEW berengkah dibuka ari kemari datai ngagai 25 Jan tu, lalu atur pengawa tu mega mantaika entara sekeda kompeni besai minyak enggau gis, Pan Borneo Highway, Sarawak Energy Berhad (SEB), Petronas, Shell sereta sekeda nama besai bukai ti digulu ulih kompeni ari menua dalam enggau luar. #UtusanBorneo