Header Ads

  • Berita Tebaru

    Dennis minta HDA lengkas ngaga jalai ngelawa sekeda menua di Baram

    TERIMA KASIH: Uggah (enam kiba) nerima tepa ari Chairman Pengatur, Baru Tai seraya dikemata bala bukai.

    LONG LAMA, Baram: Kaban Kunsil Nengeri (ADUN) Telang Usan Dennis Ngau minta Ejensi Pemansang Tanah Tinggi (HDA) ti betuaika Sapit Kepala Menteri Datuk Amar Douglas Uggah Embas lengkas ngaga jalai ngelawa pasar nya ti deka besambung ngagai sekeda kandang menua di Pelilih Baram.

     Ku Dennis, perintah tau ngepunka pengawa enggau jalai batu dulu ari Pasar Long Lama ngagai Palan Pelilih Long Bedian di bagi menua Apoh Tutoh dalam Pelilih Baram.

     Projek tu mega tau nyengkaum simpang tama ngagai rumah panjai di sepanjai jalai 50km pemanjai.

     Ari nya, iya napatka rumah panjai Long Iman bansa Penan di Sg Tutoh (80km) ke alai 30 minit pejalai ngena perau ngagai Taman Negara Mulu, semak enggau Sungai Melinau tau dipun.

     “Jalai diperambu deka mansa lalu mai pemaik ngagai urung 20 ribu iku pengguna beberapa buah rumah panjai bansa Kenyah, Kayan enggau Penan,” ku Dennis dalam jaku dipansutka rambau pengawa ngelancharka pengerami ‘Pesta Penguman Asen’ (Festival Pemakai Menua) Telang Usan ditu, apin lama ke udah.

     Dennis mega minta jalai ari Pasar Long Lama ngagai Integrated Highland Agriculture Station (IHAS) di Long Banga/Peluan lalu udah nya ngelawa Tanah Tinggi Bario digaga.

     Dalam jaku dipansutka iya, Dennis bisi madahka sekeda ari peminta bukai ngagai perintah nengeri ngambika seruran ngemansangka pasar nya.

     Tu nyengkaum ngangkatmanahka Opis Betanam Long Lama, diangkat nyadi opis ti meruan agi di pelilih nya.

     “Opis ke bisi diatu nadai entu ngemai pangka ngagai komuniti menua tu laban servis ti disediaka iya enda chukup,” ku iya, seraya nambah, nyauka manggai 90 peratus ari 40,000 peranak di Telang Usan datai ari orang bumai sereta regas ngaul diri ba pengawa betanam betupi.

     Dennis mega minta perintah nengeri ngambi ngaga palan ngumpul ungkup asil betanam betupi enggau produk kraf jari di Long Lama.

     “Kami di Telang Usan ngeluarka mayuh asil betanam betupi enggau priduk kraf jari tinggi kualiti.

     “Sayau amat, semangat nyadi orang dagang bala komuniti menua pesisir udah mantul ketegal nadai tentu orang meli, udah mangka penatai pemisi mayuh ruang bilik ditu,” ku Dennis.

     Perintah nengeri mega udah dipinta mukamayuh agi lot tanah ngagai Opis Menteri Pengawa Berumah enggau ejensi bekaul ngaga rumah kus numbas pemurah ngagai peranak Telang Usan.

     “Endang bisi pematut numbuhka ‘Critical Mass’ dikena nyukung pengerembai enggau pemansang ekonomi menua tu.

     Kami udah nerima mayuh peminta ngiga rumah di pasar Long Lama laban ngapil gaya rumah countryside.

     Dikena nentuka kereja ngintu jalai ke diatu ulih dipejalaika enggau meruan, Dennis mega ngiga begunan opis ungkup Opis Kereja Raya (JKR) di Long Lama.

     “Opis tu patut disikap enggau kereban injin sereta bala staf ulih ditumbuh nyadi tim Ngemanahka Jalai Mindah Kin Kitu bejalaika pengawa ngintu jalai batang lalu nentuka iya ulih seruran dipejalai sereta ulih ngemanahka gaya jalai ti rusak baka ketegal tanah tusur, ngemanahka jalai enda rata sereta pengerusak laban ujan bangat,” ku iya.

     Kelimpah ari lot tanah ungkup pengawa berumah, perintah nengeri mega tau meri endur kena bungkur pelin strategik Long Lama Rural Growth Centre (RGC) ngagai sektor peribit ti bisi penau numbuhka lot kedai palan ekonomi baru ngagai penambah kedai ke bisi diatu.

     Perintah mega udah diansak ngenyampatka pengawa ngaga Sekula Primari (SK) Ubong Emang baru ngambika disikap ngena perengka guna pemun ungkup bala nembiak enggau pengajar di RGC Long Lama.

     “Kami mega deka minta ngagihka kandang menua ungkup sektor peribit numbuhka palan aktiviti lumba kasar.

     Tu ulih mantu matak penatai mayuh agi pengusung ngagai pasar Long Lama sereta kandang menua ke bukai di sitak Telang Usan.

     “Tu endang deka gawaka pengerembai ekonomi peranak di bagi menua tu nengah aktiviti dagang temuai,” ku iya, seraya nambah perintah nengeri mega patut ngangkatmanahka sistem arus penyambung di pasar Long Lama ti mega deka gawaka pemansang dagang temuai ditu.

     Berebak enggau pengerami nya, Uggah ke mega Menteri Betanam Betupi Moden, Tanah Adat enggau Pemansang Kandang Menua ngemendarka penumbuh Palan Ngumpul, Nginjin enggau Nungkus (CPPC) sereta ngangkatmanahka sistem arus penyambung Long Lama.

     “Kitai deka beratika peminta ke bukai maya aum enda lama da agi lalu perintah nengeri deka seruran keran ngemai mayuh agi pemansang ngagai Baram,” ku iya nambah.

     Ngelansa pasal pengerami nya, Dennis ke mega penyanding penemu ngarapka pengerami deka seruran diatur dudi hari.

     “Pengerami tu meri awak ngagai peranak menua tu meda nama ti dikemisi sida sereta teulihka penemu mantu komuniti menua pesisir enggau sukung ari bala ketuai kitai.

     Kitai ngarapka pengerami tu deka nyadi buah kenang mensia mayuh ukai semina di Sarawak tu aja tang mega di serata dunya,” ku iya.

     Ba lansa ke bukai, Kaban Parlimen (MP) Baram Anyi Ngau madahka pengerami tu manah endar sereta inisiatif ti inovatif laban iya mega ulih nyempulang pengerami ke bukai ditu nyengkaum Festival Ai Long Lama.

     “Tu pelasar ungkup komuniti menua tu chakah ngaul diri dalam aktiviti betanam betupi ti mantu ngenegapka ekonomi menua pesisir sereta ngangkatka tikas pemanah ekonomi rama peranak menua pesisir,” ku iya.

     Anyi mega bisi mantaika sukung iya ba semua peminta dibantaika ADUN Telang Usan Dennis Ngau.

     “Tu meri komuniti menua pesisir awak bekenaka semua awak ke bisi dikena ngasaika perengka guna ti disediaka perintah.

     “Aku mega deka ngapil ngagai nembiak redak aku ngambika meri sukung laban kitai endang keran, naka ulih gawaka sitak parlimen tu enggau sitak bepilih,” ku iya nambah.

     Sama bisi datai Sapit Speaker Aum Kunsil Nengeri (DUN) ke lalu nyadi ADUN Mulu Datuk Gerawat Gala, Menteri Muda Kaunsil Kandang Menua Datu Dr Penguang Manggil enggau mayuh agi ke bukai. #UtusanBorneo

    No comments

    Post Top Ad