Header Ads

  • Berita Tebaru

    Fatimah udah nyambut penemuai raban ari WCBF lemai kemari

    Dato Sri Fatimah Abdullah
    KUCHING: Menteri Pengelantang Pendiau, Komuniti, Orang Indu, Ruang Bilik enggau Pemansang Anak Mit, Dato Sri Fatimah Abdullah udah ngelaluka penemuai urung sepuluh (10) iku pesereta ari World Chinese Badminton Federation (WCBF)ke bisi nemuai ngagai Kuching Lemai kemari.

    Raban nya ti datai ari China, Australia, New Zealand, sekeda ari Semenanjung Malaysia enggau Sibu, disempulang presiden gerempung nya, Wu Jun-Yan ti madahka sida temegah ati ulih nemuai ke Sarawak, lalu deka ngangkatka pekit bemain badminton entarabansa di Kuching, ke dikumbai ‘International Friendship Through Badminton’.

    “Enti kitai ngereja pengawa lumba enggau main, baka Badminton, siti main ke bepengerai, kelimpah ari negapka agi kaul kitai ba renggat entarabansa. Enti aku enda kitu (Sarawak), engka aku enda betemu enggau menteri tu (Fatimah).

    “Aku udah mayuh bekelala enggau mensia mayuh ngelingi dunya, lebuh bemain ba arena entarabansa. Lumba enggau main ngankatka pengerai,” ku iya madah ba aum media lebuh betemu enggau Fatimah di Wisma Wanita ditu, kemari.

    Di China, ku iya, rebak baka sida iya, urung 80 iku orang tuai-tuai nyengkaum 5 iku ke agi aktif bemain Baadminton berumur lebih 90 taun, lalu siku ke agi bemain berumur 97 taun, lalu di China, bala nembiak dilatih ari mit bemain badminton.

    Pengawa pekit bemain badminton renggat entarabansa tu deka diatur di Kuching dalam taun 2019, lalu ukai semina China aja ke deka begempung bemain badminton tu, taja pan menua nya ke ngatur pekit tu, tang semekih tu dibuka ngaga renggat dunya.

    Pagila (hari Lima, raban tu deka betemu, nemuai meri basa ngagai Menteri Pengawa Dagang Temuai, Seni, Adat Pesaka, Nembiak, Lumba enggau Main, Datuk Abdul Karim Rahman Hamzah, sebedau sida iya ngelawa pala lumba enggau main di mengeri tu, meda kediri empu pemisi perengka guna ditu.

    “Kami deka meda pemisi perengka guna lumba enggau main di mengeri tu, kelimpah ari betemu enggau Abdul Karim. Kami gagit endar ati ngasuh Sarawak ngatur pengawa tu,” ku iya, ke madahka pekit tu ke pemadu besai dibai ngagai Bandaraya Kuching dalam taun 2019, alai pemayuh tubuh nya mungkur urung 3,000 penyereta ari serata dunya.

    Ba jaku timbal ari Fatimah, iya ngelaluka raban tu ngagai Sarawak, lalu ngangkatka Sarawak ke nyelai ari menua bukai kelebih agi ari sukut diversiti.

    “Kami temegah ati ngangkatka Sarawak lalu temegah ati mega laban kita milih Sarawak, laban kami di Sarawak sigi deka mandang ngagai dunya penyelai Sarawak ari sukut diversiti, ari sukut bansa, adat pesaka, pengarap kami tang kami sama bediri beserakup.

    “Sarawak mega endur negaka kaul kitai ba arena entarabansa…Kami ngelaluka kita kitu, lalu ngarapka kitai ulih sama-sama nyapai pengelikun global nengah badminton,” ku iya.

    Maya nya ila, raban tu mega deka ngelawa palan dagang temuai di menua tu.

    Pekit tu ila deka ngembuan mayuh macham kategori, ke semua renggat umur, baka pekit ke apai enggau anak lelaki, pekit ke indai enggau anak indu, Veteran ke berumur ari 40-70, enggau siti penyelai kategori, bemain ba siti kort ke bisi tiga iku pemain.

    Sama bisi enggau ngelaluka temuai nya kemari, Menteri Muda Pengelantang Pendiau Komuniti, Datuk Francis Harden, enggau Direktor Opis Orang Indu enggau Pemansang Ruang Bilik, Noriah Ahmad. #UtusanBorneo

    No comments

    Post Top Ad