Header Ads

  • Berita Tebaru

    Gaya ekonomi ti enda berapa deka meri empas ba pemutus PRU14, ku Wan Zain

    Dato’ Wan Zain Syed Mohdzar
    MIRI: Gaya ekonomi ke enda tentu sereta belanja pengidup majak ti tinggi deka meri empas ba pemutus Pengawa Bepilih Besai ke-14 (PRU14) tu ila.

    Pemerati Politik, Dato’ Wan Zain Syed Mohdzar madahka perintah patut beratika pengawa dikena mantu rayat laban belanja pengidup, kes penyalah majak nambah, orang nadai kereja makin mayuh, pengawa salah ke ngaul orang gawa perintah sereta ke bukai mega dikaul enggau pengelemi perintah.

    “Enti sema perintah enda beratika isu tu di renggat baruh, kitai pechaya tu deka ngubah pemutus maya PRU tu,”ku iya madah ngagai The Borneo Post kilah ensana.

    Kelebih agi rayat chukup pintar nyerenih pemanah pengawa perintah lalu deka ngaga pemutus milih perintah baru nyema pengelantang sida enda diintu memanah tauka diperati enggau manah.

    “Penyampau tubuh raban graduet enggau sida lepas sekula ti nadai kereja nambah, nya kebuah ngasuh kitai irau sida tu deka ngereja penyalah,” ku iya.

    Ba pekara tu, ku iya, perintah patut bejalaika baru kuota ngambi orang gawa sektor perintah ti udah diketu ngelama tu.

    “Orang gawa perintah ti bisi rikod penyalah sereta penanggul disiplin patut ditukar enggau pekereja baru,” ku iya nerang.

    Ku iya nambah, rebak baru ti nerima teknologi pemadu baru tentu deka milih perintah ti nyaga enggau ngintu pengelantang sida laban penerang endang udah bisi disedia ungkup sida.

    “Aku pechaya sida ti ulih ngundi deka ngayanka pengeringat sida ba atas keretas laban sida bisi hak milih perintah,” ku iya.

    Ku Wan Zain, ulih disadang deka nyadi peragam PRU deka berubah lalu kitai deka meda penuduk Barisan Nasional (BN) dirampas parti penyakal.

    “Bantu perintah ke bisi diatu naka ni ulih mantu rayat napi belanja pengidup tinggi,” ku iya nerang.

    Taja pia, ku iya, pemutus agi bepanggai ba jari rayat, nyema sida ngasaika perintah patut ditukar, iya deka belalauka keretas undi. #UtusanBorneo

    No comments

    Post Top Ad