Gaya rampa menua nyadi penguji raban bomba Sarawak -->
Cari Berita

Advertisement

Gaya rampa menua nyadi penguji raban bomba Sarawak

Admin | beritaiban@gmail.com
January 23, 2018

MERESA BARIS: Dr Sim meresa baris raban bomba di BBP Sungai Merah, kemari.
SIBU: Menteri Kaunsil Kandang Menua enggau Pengawa Berumah Datuk Dr Sim Hui Kian udah ngelawa Balai Bomba enggau Penyelamat (BBP) Sungei Merah, kemari.

Penatai iya disambut Direktor Opis Bomba enggau Penyelamat Malaysia (JBPM) Sarawk Nor Hisham Mohammad, Ketuai Zon 4 JBPM Misran Bisara enggau Sekretari Politik Kepala Menteri Micheal Tiang sebedau iya dibai meda kandang endur BBP Sungai Merah.

Lebuh ti bejaku ba pengerami nya, Dr Sim ke mega Kaban Kunsil Nengeri (ADUN) Batu Kawah madahka penguji ti besai raban bomba di Sarawak iya nya gaya rampa menua di nengeri tu.

“Aku suah bejaku ba aum kaunsil nengeri madahka ba Sarawak kitai enda ulih semina meda pematut bomba nya nitihka penyampau komuniti, tang patut ngemeratka gaya rampa menua mega.

“Taja pan kitai bisi servis nyelamat enggau ngena perengka pengankut langit baka helikopter, tang tu enda baka ti ngembuan servis bomba di kandang endur nya empu,” ku iya.

Beserimbai enggau nya, iya ngarapka raban bomba di Sarawak ulih nyadi inovatif lebuh ti bejalaika pengawa sida nyadi raban penyelamat.

Kelimpah ari nya, Dr Sim mega udah ngenataika pengaga ati ngagai JBPM laban ti udah bejalaika pengawa ungkup komuniti baka ngatur mayuh program meri penyedar baka licha penusah angus, latih napi penusah angus enggau ke bukai.

“Servis ti bansa tu deka meri mayuh awak ngagai opis bomba dikena ngerapitka kaul enggau komuniti seraya ngemudahka kerejasama,” ku iya.

Ba pengujung jaku, iya udah madahka geran sepenyampau RM10,000 ungkup Kelab Rekreasyen JBPM Sarawak ba Zon 4.

Dulu agi ari nya, ba jaku pengelalu Misran madahka Zon 4 Sarawak iya nya zon keempat ari atur opis JBPM nengeri ti mungkur zon tengah nengeri ke ngembuan pemesai 39,138 kilometer persegi ti nyengkaum empat bagi menua iya nya Sibu, Sarikei, Mukah enggau Kapit.

Ku iya nambah, bisi semilan balai bomba ari baruh Zon 4 iya nya BBP Sibu, Sungai Merah, Sarikei, Bintangor, Kanowit, Kapit, Song, Mukah enggau Tanjung Manis ti baru beoperasyen taun tu.

“Penyampau raban bomba di Zon 4 iya nya bisi 242 iku pemesai penuh masa (PSM) enggau 62 iku pemesai bomba bantuan (PBB).

“Pia mega balai bomba kitai ke deka beoperasyen taun tu iya nya BBP Daro, Balingian enggau Matu,” ku iya. #UtusanBorneo