Header Ads

  • Berita Tebaru

    Graduet patut nyikap diri landik bejaku English

    Anthony Banyan
    KUCHING: Ripot ari Malaysian Employers Federation (MEF) madahka raban graduet patut beratika diri empu enti sida enda teulihka pengawa. Pekara tu nyadi ukai ketegal nadai pengawa tang graduet enda ulih ngereja pengawa ke di pinta sida, laban nadai pengelandik bejaku English.

    Ex-Mandal Presiden Serakup Nasional Dayak Sarawak (SDNU) Anthony Banyan madah Jaku English nyadi jaku kedua di Sarawak, lalu graduet di menua tu patut bisi pemerat ke jaku nya di Sarawak, kelebih agi enti sida bisi ati gawa ba kompeni antarabansa ke sigi ngemeranka Jaku English.

    “Nya alai, bala nembiak kitai sigi diperansang mesti nemu bejaku sereta nulis ngena Jaku English.

    “Baka pengawa ba opis Perintah, engka enda ngemerat tang ba kompeni sigi ngemeratka Jaku English. Enti nembiak landik ba Jaku English, nya nyadika siti pengelebih maya minta kereja tauka intebiu,” ku Anthony madah maya dikerandau ulih Utusan Borneo ditu, kemari.

    Bejaku English sabjek enda tau enda digaga nengah bejaku, macha sereta nulis, ku chairman Gerempung Dayak Iban Sarawak (SADIA) pampang Kuching, Datuk Paduka Anthony Nait.

    “Kuasa nya ukai semina di pelajar di sekula aja, tang nengah bejaku enggau orang bukai, kaul kitai enggau orang ke endang bejaku English, sereta rajin macha bup, majalah tauka surat berita English,” ku Nait.

    Berindik ari nya ku iya, graduet Iban tauka Dayak enda tau enda pandai nguasa Jaku English kelebih agi sida ke bisi ati deka gawa ba kompeni entarabansa, tauka swasta.

    “Nyema graduet deka gawa ba opis tauka ijinsi Perintah, Jaku English mega agi berat ba ijinsi tu, taja pan iya Jaku lumur Dua (udah Bahasa Melayu) di menua tu.

    “Ketegal enda landik bejaku English, ulih ngasuh siku-siku orang enda bulih pengawa ke dipinta sida, laban nya pemerat ba siti-siti kompeni tauka opis.

    “Ambika chunto, taja pan umur aku tu udah tuai, tang pengawa ke digaga aku tiap ninting pagi maya ngirup kopi, macha surat berita dalam Jaku English, tauka macha berita portal dalam English ba talipaun aku. Nya alai, belajar English tu enda ngira tuai biak, aku empu udah tuai tang agi seruran ngiga penemu,”ku iya.

    Siku pengereja pengawa ba sebuah hotel di Kuching, Shafeenaz Shein, 28 madah mayuh orang ke ditemu iya lebuh minta kereja enda bulih laban enda landik bejaku English.

    “Berat ba aku landik bejaku English lebuh minta pengawa/kereja laban Jaku English tu, jaku entarabansa. Dini-dini kitai pegi pan, Jaku English jaku berat ba nyauka tiap buah menua dalam dunya tu.

    “Jaku English mega berat laban nyauka semua intebiu (lebuh minta pengawa) digaga dalam Jaku English. Makin mayuh penemu kitai dalam Jaku English, baik nya ari jaku tauka nulis, besai agi peluang kitai deka bulih pengawa,” ku iya lalu nandu baru madahka endur iya gawa diatu pan ngena Jaku English.

    Rachel Sima anak Gilbert Libu, 25, siku pengereja pengawa ba hotel antarabansa ditu meri penemu iya ke nyelai mimit, laban ku iya, Jaku English ukai pelepa ngulihka pengawa ba graduan Dayak.

    “Ba peneleba aku ke udah napi mayuh intebiu, orang ke ngaga intebiu nya deka meda ni naka pengelandik kitai bejaku enggau orang bukai.

    “Ba sida ke ngaga intebiu nya, enti kitai landik bejaku sereta mayuh peneleba, besai agi peluang bulih pengawa. Mayuh ari utai ke ditanya maya intebiu, orang nya deka nanya aku, ‘Nemu bejaku Mandarin?’. Tanya nya suah agi kelimpah ari orang nanya, ni naka pengelandik aku nulis sereta bejaku dalam English,” ku Rachel.

    Rachel madahka baka pengawa iya ke diatu, mayuh betemu ukai semina enggau orang menua tu aja, tang orang ari menua luar ke begunaka iya landik bejaku English.

    “Bisi sekeda orang ke sama gawa enggau aku, agi bedau landik bejaku English, lalu enggai nguji bejaku English, laban takut ke salah,” ku iya.

    Sebuah kompeni ke ngiga pengawa ke (client) sida iya, JobStreet Malaysia, lebih 26,000 batang pengawa benung ngiga orang gawa.

    Pegawai Kanan Marketing Communication ompeni nya, Jessica Heng, nitihka berita portal FMT lebuh berandau enggau iya madahka setengah ari pengawa nya ngiga nembiak ke baru udah gaduet sereta pangku pengawa eksekutif.

    Ku Heng, nitihka pansik ti digaga ulih JobStreet.com taun 2017, seruran bisi tikas entara pemerat kedeka kompeni ke ngiga orang sereta kualiti graduet.

    “Nyauka 75 peratus kompeni ke ngiga orang gawa madahka sida iya kualiti graduet semina naka pukul rata aja,” ku iya.

    Heng mega meri lima pekara kebuah nembiak ke baru graduet enda mujur bulih pengawa, laban 72 peratus minta gaji sereta peminta ke enda realistik; 64 peratus kelalu milih pengawa; 64 peratus ngembuan ulah ke enda manah; 59 peratus penemu pasal Jaku English enda manah enggau 53 peratus enda ngembuan pengelandik bejaku enggau mensia mayuh. #UtusanBorneo

    No comments

    Post Top Ad