Industri sarang burung walit nyungkak ekonomi peranak tebing tasik -->
Cari Berita

Advertisement

Industri sarang burung walit nyungkak ekonomi peranak tebing tasik

Admin | beritaiban@gmail.com
January 23, 2018

Datuk Dr Juanda Jaya
MUKAH: Sarang burung ‘emas’ tauka burung walit bisi pengulih nyungkak tikas ekonomi peranak nyadi siti ari penatai pemisi baru sereta ulih besemekih dalam industri bekaul.

Kaban Kunsil Nengeri (ADUN) Jemoreng Datuk Dr Juanda Jaya madahka, peranak di semanjai tebing tasik diperansang ngaul diri ba bidang bekaul ungkup penyulut pengidup dudi hari.

“Kitai diau di kandang strategik sarang burung ‘emas’ lalu iya nyadi siti industri ti bela nyamin pengidup dudi hari bala pedagang,” ku iya madah ngagai Utusan Borneo kilah ensana.

Nitih ku iya, taja begunaka puku dikena ngepunka dagang, tang iya ditemu ulih dikena ngubah nasit ruang bilik enggau nyamin pengidup dudi hari.

Dagang sarang burung walit nyadi siti ari industri penatai pemisi baru ti meri penatai pemisi mayuh ngagai pedagang.

Menteri Bumai enggau Industri Betanam Betupi, Datuk Seri Ahmd Shaberi Cheek, Hari Satu tu tadi, bisi bejalai ngabas sekeda kedai dagang enggau palan endur sarang burung walit di kandang ngelingi Mukah.

Bulan nyin tadi, ngerikod entara rega meli pemadu tinggi, nyapai RM5,000 untuk sarang burung bedau diinjin lalu bisi antara pedagang di Mukah teulihka penatai pemisi manggai RM100,000 ba sekali asil ketau sepenyampau 20 kilogram.

Shabery Cheek mega madahka perintah Malaysia ba renggat randau kepenudi bekerejasama enggau China nyadi pengeksport besai sarang burung walit ngagai menua nya enda lama da agi.

Malaysia kala eksport sarang burung walit ke China tang datai ba maya nya, iya diketu laban bisi kes mit bekaul enggau kualiti sarang burung nya.

Statistik nunjukka Malaysia ulih ngeluar nyauka 400 tan metrik setaun tang semina 60 tan metrik dieksport ke menua luar.

Kebuah pia laban makit enda entu manah ke alai sarang burung walit ditemu bisi dieksport ke menua bukai baka Hong Kong, Vietnam sereta ke bukai dulu agi sebedau iya dianjung ke China. #UtusanBorneo