Header Ads

  • Berita Tebaru

    Industri sawit menua deka napi pemar ketegal pemutus EU

    Datuk Amar Douglas Uggah Embas
    EU merambu enda ngakun biofuelsminyak sawit, sebagi ari Renewable Energy Directive (RED) nengah undang-undang EU.

    KUCHING: Sapit Kepala Menteri Datuk Amar Douglas Uggah Embas madahka pengeluar sawit Sarawak diatu napi penanggul enda diakun ari Kesatuan Eropah (EU)..

    Peranak Sarawak, kelebih agi patut nemu empas penanggul tu ngagai eksport minyak sawit ti tau meri empas ngagai asil nengeri sereta mayuh komuniti kitai, pia ku Uggah ke mega Menteri Betanam Betupi Moden, Tanah Adat enggau Pemansang Kandang Menua.

    “Di Sarawak, bisi mayuh penanam sawit ti majak mansang, sekalika pekebun mit ti ngatika diri, pekebun mit ari baruh Salcra tauka Felcra tauka sida ti ngaul diri dalam pengawa kunsi enggau sektor peribit ari baruh Opis Pengintu enggau Pemansang Tanah (LCDA tauka Pelita). Salcra ngatur 19 ladang sawit enggau pemesai 51,072 hektar sereta lima buah Kilang Sawit ari Pelilih Lundu di barat ngagai Roban di timur. Raban kitai, enggau gerempung pekebun mit kitai, betuaika Salcra netap deka mutarka penanggul tu,” ku iya nengah penerang dikenatai ngagai The Borneo Post kemari.

    Felcra iya nya Federal Land Consolidation and Rehabilitation Authority.

    “Penanggul iya nya EU merambu enda ngakun biofuels minyak sawit, sebagi ari Renewable Energy Directive (RED) undang-undang EU ti matau semua atur bekaul enggau kuasa ulih dikena baru, nyengkaum minyak sawit biofuels ari baruh RED Directive, dua bulan ke udah,” pia ku Chairman Pengempung enggau Pengintu Tanah Sarawak (SALCRA) Uggah.

    “Keterubah endar, Komiti Rampa Menua Parlimen Eropah ngundi dakam bulan Oktober 2017 ngambi enda ngakun biofuels minyak sawit dari baruh RED. Udah nya, dalam bulan November, perambu enda ngakun nya udah ditukuka Parlimen Komiti Industri, Pansik & Kuasa.”

    Pemutus ke penudi deka digaga pengudah randau antara Perintah EU (dikelala kolektif nyadi Kaunsil) enggau Parlimen Eropah, ku Uggah nambah, tu tau ngenusahka Malaysia, enggau Sarawak, enti pengawa enda ngakun minyak sawi biofuels  nya dipajakka.

    Eropah makit besai ngagai minyak sawit biofuels Malaysia, urung 60 peratus ari eksport Minyak Sawit Malaysia ngagai EU diatu ngagai sektor ukai-pemakai, enggau biofuels nyadi sebagi ari nya. Bilion ringgit penatai Minyak Sawit ari Sarawak enggau nengeri Malaysia ke bukai deka lenyau pia aja. Empas nya deka besai, kelebih agi ngagai pekebun mit.

    Batang tuju Salcra iya nya nempa pengawa puang dalam sektor betanam betupi sereta nyediaka tikas pengidup ti meruan ngagai peranak menua pesisir nengah tikas penatai pemisi ke tegap sereta meruan agi. Pengawa EU enda ngaku minyak sawit biofuels deka nekul juluk tu, pia ku iya.

    Salcra mantu ngangkatka pemanah ekonomi enggau pengelantang rama sereta ngubah peranak menua pesisir ti bisi endur sida beoperasyen laban keran deka majakka pemansang enggau penegap ba tanggungpengawa rama ba chara operasyen sida. Pekara pengelikun enggau pengerai, sereta mega ngemeranka chara betanam betupi nyadika kunchi ba kaul Salcra.

    “Nama pengawa ulih digaga kitai dikena nagang pekara tu nyadi? Bala pekebun mit Malaysia patut begempung mantah perambu EU enggau sada ke tegap. Aku udah ngerah Salcra nyereta kimpin besai ke baru “Faces of Palm Oil”, ke mega deka nyengkaum Felda, Doppa enggau Nash. Aku ngansak semua peranak Sarawak ngelawa website http://www.facesofpalmoil.org lalu meri sukung,” ku iya.

    Felda tu Federal Land Development Authority seraya Doppa iya nya Serakup Penanam Sawit Dayak lalu Nash iya nya Serakup Pekebun Mit Nasional Malaysia.

    “Perintah kitai, bala diplomat enggau pemesai kanan ke bukai mega bejalaika pengawa ngarika bala pekebun mit kitai. Randau enggau bala menteri menua Eropah beguna endar dikena ngetanka hak bala pekebun mit kitai. Kitai ulih nerangka penuduk Malaysia, lalu penentu bala pekebun mit kitai, sereta sida ke dalam perintah mantah pengawa EU,” ku iya nambah.

    “Bulan ti deka datai iya nya maya ngaga pemutus. RED deka diputuska di Brussels ba pun taun tu. Reti iya, eksport minyak sawit Malaysia biofuels ngagai Eropah deka ditentu sekalika positif tauka negatif dalam semina beberapa bulan aja. Kami mega nadai awak deka alah, nya kebuah kimpin bala pekebun mit beguna endar, sereta ba timpuh ke betul.”

    “Kitai meseti anang ngambi sebarang peluang, pengidup enggau penatai pemisi 10 ribu pekebun mit Sarawak ba jari kitai. Aku ngansak semua pemacha enggau kami mantah perambu EU enda ngakun minyak sawit biofuels , ti deka meri penekul ba pemujur pengawa betanam betupi Sarawak,” ku Uggah ngansak. #UtusanBorneo

    No comments

    Post Top Ad