Header Ads

  • Berita Tebaru

    Integriti sereta profesional nyadika pengering raban RELA nyaga pengelikun

    Datuk Andrew Wong
    SIBU: Integriti sereta ngereja pengawa enggau profesional nyadika pengering raban Opis Sukarelawan Malaysia (RELA) maya bejalaika pengawa matau pengelikun.

    Ketuai Pemesai (Perhubungan) Rela (KPRK) Bagi Sibu Datuk Andrew Wong madah, ngemeranka dua bengkah ulah nya tau nejuka mensia mayuh meda RELA sebengkah raban ti bedisiplin nentuka pengelikun komuniti.

    “Maya kitai bejalaika pengawa matau, kitai ke nyadi RELA meseti bisi ngemeranka intergriti enggau ulah ti profesional.

    “Kitai enggai dipeda orang semina nemu nyaga jalai aja,” pia ku iya madah maya bejadi ‘Program Rondaan Keselamatan Rela’ Bawang Assan ba Palan Khidmat Komuniti RELA (PKKR) Bagi Jalai Bawang Assan-Tanjung Manis ditu, malam kilah ensana.

    Andrew ti mega chairman Pelin Sibu Keterubah (RS1) ngarapka bala raban Rela bejalaika tanggungpengawa enggau manah kelimpah ti ngemeratka pengelikun diri sereta nitihka undang-undang.

    Kebuah pia ku iya, iya dekaka perintah besai meda lalu ngaga inisiatif tu ba timpuh ke panjai tang ukai semina tiga bulan aja.

    “Maya diberi awak tiga bulan tu, aku ngarapka raban RELA ti bejalaika pengawa matau ulih bejalaika pengawa nya enggau manah,” ku iya madah baru.

    KE PENGINGAT: Kong (empat kanan) nyuaka tepa ngagai Andrew Wong (tiga kiba). Sama bisi dipeda (ari kiba) Stanley, James, Awis, Andrew Ting, Andrew Shilling sereta bala ke bukai.
    Kelimpah ari nya, iya ngarapka pengawa matau pengelikun RELA nya deka dikerembai ngagai Dudong, Bukit Assek, Nangka enggau Pelawan.

    “Kita mega andal program baka tu ulih dibai ba endur bukai. Tu sebengkah program ke manah besaup enggau raban polis ngemataka pengelikun komuniti.

    “Nya alai, tim RS1 nyukung insiatif tu lalu besetuju meri ‘khemah’, lampu enggau baju ‘kalis cahaya’ ke dikena raban RELA bejalaika pengawa,” pia ku iya.

    Sama bela datai maya tu iya nya Pemesai RELA Pelilih Sibu Awis Adenan, KPRK Lanang Andrew Ting, Temenggung Stanley Geramong, Pemancha James Semilan, KPRK Bawang Assan Kong Hoi Chin sereta 100 iku raban RELA ari Bawang Assan, Sungai Melanggan, Sungai Apong, Tanjung Bekakap, Sungai Tebelian enggau Sungai Lengan. #UtusanBorneo

    No comments

    Post Top Ad