Header Ads

  • Berita Tebaru

    Integriti ti tinggi nentuka penegap pengerembai ekonomi

    Datuk Talib Zulpilip
    SARIKEI: Endang pekara ti manah nerenakka integriti ba tikas ti tinggi ngagai staf perintah laban nya kunchi dikena nentuka pemansang ti tegap sereta pengerembai ekonomi menua.

    Menteri ba Opis Kepala Menteri (Integriti enggau Ombudsman), Datuk Talib Zulpilip mansutka pekara tu, muji Residen Sarikei, Mohd Junaidi Mohidin ti udah nguluka bala pemesai Pengatur Pengawa Bagi Menua Sarikei ngangkat sumpah integriti sereta anti-makai suap.

    Semua staf di baruh Opis Residen Sarikei nyengkaum Opis Pelilih Sarikei, Meradong, Julau enggau Pakan bela bisi datai ngangkat sumpah ke diatur nyerumba Hari Integriti Pengatur Pengawa Bagi Menua Sarikei diatur di Palan Inovasyen Sarikei ditu, kemari.

    Rambau aum pengarang berita udah nya, ku Talib, iya pechayaka bala pemesai ti udah ngangkat sumpah tu udah ngingatka diri empu seruran meri komitmen enggau dedikasyen ba pengawa diri kelimpah ari nitihka atur undang-undang.

    Bala pemesai ti ngembuan integriti enda muntang makai suap ti tau ngasuh pemansang enggau tikas pemanah pengawa sereta program pemansang ekonomi dikena nyungkak status sosioekonomi rayat deka tejanggal, ku iya madah nyemetak.

    “Bala pemesai ti lurus ati iya nya sida ti gawa memanah sereta kurang makai suap deka nyamin kitai mayuh agi pemansang,” ku iya nandu.

    Dalam jaku dipansutka iya dulu agi ari nya, Talib mega ngelalau raban gawa perintah patut nemu makai suap ukai semina ari sukut mata duit aja, tang pekara ke bukai sereta servis mega.

    Ba pekara tu, iya ngelalau raban gawa perintah di semua renggat ngenyauhka diri ari makai suap, seraya nambah, bala ketuai komiti, ambika chunto, bala ketuai komuniti diperansang ngaga ripot ngagai Komiti Nagang Pengawa Makai Suap  Malaysia (SPRM) tauka Residen lebuh sida bisi nemu pekara ke salah nyadi ba projek dipejalaika sekeda kunteriktor.

    SERURAN KOMITED: Junaidi ngetuaika bala pemesai iya ngangkat sumpah integriti enggau nadai makai suap.
    Belalauka angkat sumpah integriti enggau anti-makai suap nya, Junaidi ngarapka bala staf Pengatur Pengawa Bagi Menua Sarikei mega ulih bejalaika pangku pengawa sida enggau meruan nentuka semua program pemansang ti udah diperambu ungkup bagi menua nya dipejalai nitihka pematut.

    Taja pekara tu enda wajib, iya ngarapka bala pemesai ari opis ke bukai deka bela ngangkat sumpah enggau anti-makai suap udah tu, ku Junaidi merambu.

    Antara bala ke bisi datai Ketuai SPRM Sibu, Anan Swanlerd Eh Deng Sapit Residen Sarikei Abang Mohd. Porkan Abang Budiman, Pemesai Pelilih Sarikei Christopher Ranggau, Pemesai Pelilih Meradong Haron Mahidi, Pemesai Pelilih Julau Khalid Andong sereta Pemesai Pelilih Pakan Seruji Ludin. #UtusanBorneo

    No comments

    Post Top Ad