Jaku English deka diangkat sereta dikemerat, ku Wan Junaidi - Berita Iban Online

Header Ads

  • Baru Nyadi

    Jaku English deka diangkat sereta dikemerat, ku Wan Junaidi

    Dato Sri Wan Junaidi Tuanku Jaafar
    KUCHING: Sekula sereta raban pengajar dipinta ngemeratka pelajar Jaku English ke diatu nyadi jaku antarabansa.

    Menteri Pengeraja Asal enggau Rampa Menua Dato Sri Wan Junaidi Tuanku Jaafar madah pekara nya seraris enggau pemutus perintah ti deka ngangkatka guna Jaku English.

    ‘Perintah diatu udah mutus deka ngangkatka Jaku English ba sekula sebaka enggau pemerat pelajar Jaku Melayu.

    “Diperunding ke diatu Jaku English udah nyadi jaku antarabansa ke diguna ba serata dunya. Menua mansang baka di Amerika enggau Eropah semua belajarka Jaku English,’ku iya.

    Wan Junaidi mansutka jaku nya ba aum pengarang berita pengudah nyuaka bantu beg sekula di Palan Servis Parlimen Santubong ditu, kemari.

    Iya nambah, di menua China pan pelajar Jaku English tu bela dikemerat ke alai bisi sekeda universiti di menua nya udah ngaga ubah ba sistem pelajar lalu beratka pelajar Jaku English.

    ‘Ketegal nya, Malaysia enda ulih tinggal ba atur ngangkatka guna Jaku English ti udah dikelaung ngelama tu.

    “Jaku English mengkang nyadi jaku ke beguna ba pekara pelajar, dagang sereta interaksyen sosial.

    “Aku ngarap tetiap pengajar bejalaika tanggungpengawa enggau manah ba atur ngajar Jaku English,’ku iya ke mega Kaban Parlimen Santubong.

    Ngenang kaul ke sama, iya ngarap anak Malaysia ulih nguasa tiga bengkah Jaku iya nya Jaku Melayu, English enggau China.

    Pengelandik nguasa tiga jaku tu meri pengelebih ungkup kitai ngaga interaksyen enggau orang di menua luar, tandu iya.

    Tujuh buah sekula primari iya nya SK Bako, SK Beradek, SK Tg Bako, SK Siar Campuran, SK Telok Melano, SK Rambungan enggau SK Sebat nerima bantu beg sekula ke disua Wan Junaidi kemari. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads