Jalai alun lebih menyana ungkup peranak Marudi disadang tembu dua tiga taun agi, ku Penguang -->
Cari Berita

Advertisement

Jalai alun lebih menyana ungkup peranak Marudi disadang tembu dua tiga taun agi, ku Penguang

Admin | beritaiban@gmail.com
January 23, 2018

Datu Dr Penguang Manggil
TINJAR: Peranak di Marudi patut nganti dua ngagai tiga taun endur ngasaika jalai ke lebih manah besambungka sekeda rumah panjai ba sitak nya ngagai Baram enggau Miri.

Menteri Muda Kaunsil Kandang Menua Datu Dr Penguang Manggil madah, bisi sekeda projek jalai diatu agi benung digaga lalu iya andal nya deka dipejalaika enggau lengkas bepelasarka pengulih perintah.

“Tu nyengkaum pengawa ngaga jalai batang diatu ba Long Tisam ngagai jala bebatu. Aku udah minta Opis Menteri Pemansang Menua Pesisir enggau Kandang Menua (KKLW) mantu bejalaika projek tu.

“Aku ngarapka KKLW ulih bejalaika projek tu taun tu. Enti udah tembu ila, iya deka meri pemaik ngagai peranak Long Tisam enggau sekeda peranak rumah panjai besemak,” ku iya rambau Pengerami Ketuai Begulai enggau Rayat sereta Pengawa Nyuaka Setipikt Baru sereta Setipikit nampung pengawa ungkup bala ketuai raban di Pelilih Beluru diatur ba Rumah Jarau, semak Long Tabing, Tinjar kena Hari Minggu tu tadi.

Penguang ke mega Kaban Kunsil Nengeri (ADUN) Marudi madahm iya deka minta Opis Wang Nengeri nyendiaka geran ari MARRIS dikena ngaduka mayuh agi jalai ba menua pesisir sereta sekeda sitak nyengkaum Sungai Peking, Logan Mulong enggau Long Lama ke patut dikemanah lengkas.

Kelimpah nya, agih ungkup Projek Transformasyen Menua Pesisir (RTP) deka dikena ngemanahka sekeda jalai ke semina mungkur dua ngagai tiga kilometer.

“Berindik ari nya, aku ngarap peranak sitak Marudi besabar lalu aku nemu

dalam timpuh dua tauka tiga taun kitai deka meda mayuh agi jalai deka dikemanah lebih agi ba Marudi-Baram enggau Miri-Marudi,” ku iya.

Ngelansa pekara bukai, Penguang madah iya enda kama agi deka mai Menteri Muda Pelajar enggau Pansik Dr Annuar Rapaee ngabsa sekeda sekula ba Marudi.

Ku iya sekeda sekula ke patut dikemanah nyengkaum Sekula Primari (SK) Kuala Bok ke udah rusak ketegal bah.

“Ungkup timpuh pandak, kitai deka beratika pekara tu ngambika belanja ulih diberi dikena ngemanah sekuka nya.

Udah nya, ungkup perambu timpuh panjai kitai ngarapka Opis Pelajar Nengeri Sarawak ulih ngengkah nembiak ari sekula ke mimit ngagai siti sekula enti ulih,” ku iya.

Udah nya, urung 26 ketuai raban bansa nerima setipikit nampung pengawa sida nyerumba pengawa nya.

“Aku ngarap sida ke udah dipadu enggau sida ke disambung pengawa ulih bejalaika pengawa enggau manah sereta nyerakupka semua nembiak redak ke dijaga kita,” ku iya.

Sama bisi datai Residen Miri Sherina Hussaini, Direktor Pendawa Sabah Robert Pasang Alam, Pemesai Pelilih Beluru Mohd Rashdan Hazemi, Sekretari Politik Kepala Menteri Alexander Asing, Chairman Kaunsil Pelilih Marudi Edward Mendai enggau sekeda tuai raban bansa. #UtusanBorneo