Jalai semin nyungkak tikas pengidup peranak Rumah Untang -->
Cari Berita

Advertisement

Jalai semin nyungkak tikas pengidup peranak Rumah Untang

Admin | beritaiban@gmail.com
January 25, 2018

Jefferson Jamit Unyat
KAPIT: Peranak Rumah Untang Jirau, Nanga Sekura, Sungai Ulu Yong ditu beterima kasih ngagai Kaban Kunsil Nengeri (ADUN) Bukit Goram Jefferson Jamit Unyat ti udah nyaup meri agih belanja ngaga sambung jalai semin pemanjai 200 meter enggau 8 kaki pemesai ari simpang jalai besai ngelawa rumah panjai.

Jalai tu udah tembu digaga pengujung taun 2017 ti meri pemaik sereta nyungkak tikas pengidup urung 200 iku peranak ari 30 pintu bilik di rumah panjai nya.

Ku sida, diatu entukar ulih sangkai ba mua pintu, ari ke dulu suba dipaking nisi jalai besai, jauh ari rumah panjai. Tambah mega, ba mua rumah panjai udah disedia endur paking entukar, chukup lantang.

Jamit disempulang bala ketuai opis perintah, ketuai komuniti enggau staf Palan Servis PBB Bukit Goram udah ngatur pejalai gawa ngabas sambung jalai nya kemari.

Jamit udah nya madahka diri puas ati enggau kualiti kereja digaga bala kunteriktor.

“Tu jalai semin 200 meter pemanjai beungkus RM100,000 digaga di baruh Program Transformasyen Menua Pesisir (RTP) pulaika pemaik peranak Rumah Untang Jirau.

“Aku berasai lantang meda kualiti kereja digaga kunteriktor lalu tu mega bejalaika Tanggungpengawa Rama Korporat (CSR) sida empu mantu peranak nyebelaka tanah mua rumah panjai endur paking enggau nadai belanja tambah,” ku Jamit.

Iya madah ngagai peranak rumah panjai ke alai perintah ngenang sukung sida rambau Pengawa Bepilih Nengeri (PRN) suba. Iya ulih menang enggau majoriti besai laban sukung sida.

LANTANG ATI: Peranak 30 pintu bilik Rumah Untang Jirau muji Jamit ti udah mujur ngaga jalai semin 200 meter pemanjai, pulaika pemaik komuniti rumah panjai. Jamit (lima kiba) seraya Ambrose Abong (empat kiba) begulai enggau bala bukai.

Ari baruh perintah BN, rumah panjai ditu terus mansang disikap enggau infrastruktur pemun enggau projek perengka guna. Idup nyadi muntang agi di rumah panjai.

Iya ngingatka sida seruran nyukung perintah nentuka aktiviti pemansang enda tejanggal.

“Ingatka, semua projek pemansang ari perintah, ti nangkup peminta semua rayat. Ari sukung kita nadai bebagi, kami pengari rayat ulih nyelinting perambu sereta bejalaika projek pemansang.”

Maya Pengawa Bepilih Besai (PRU) ti deka datai, Jamit ngapil rayat meruan nyadi tulang belakang perintah. Ku iya, penyandang chalun BN Datuk Alexander Nanta Linggi deka ngetanka penuduk iya.

“Kitai agi begunaka servis Nanta, nya kebuah maya PRU tu, sukung mih iya.

“Nanta ke nyadi Sapit Menteri Pemansang Menua Pesisir enggau Kandang Menua di Putrajaya udah bisi kaul teguh enggau bala menteri di Perintah Besai. Peneguh kaul tu ngemai mayuh projek pemansang dipejalai di Kapit.

“Nyadi rayat, kitai meseti meri iya sukung nadai bebagi nentuka kaul nya teguh agi, reti iya mayuh agi agih belanja ungkup Kapit. Kaban Parlimen (MP) – Nanta, enggau ADUN (aku empu) gawa rat begulai nentuka semua Komiti Pemansang enggau Pengelikun Genturung Pendiau (JKKK), Serakup Apai Indai enggau Pengajar (PIBG), serakup enggau kelab ulih diintu memanah.

“Nyadi pengari rayat, kami naka ulih ngintu pengelantang semua nembiak di menua pegai diri. Kami ulih ngereja pengawa tu enggau belanja bejalaika aktiviti laban kami ari perintah ti megai kuasa,” ku Jamit nerang.

Nya kebuah iya ngelalau rayat nulak penyakal tauka orang ngatika diri maya PRU ti deka datai laban sida enda ulih gawa. Sida (penyakal) semina nemu bejaku ngapa, nyalahka pemanah pengawa perintah ti mantu rayat.

Antara bala bisi datai Pemesai Pekara Khas Nanta, Ambrose Abong Bugek, bala staf Palan Servis PBB Bukit Goram Cochan Awie, Ketuai Nembiak PBB Bukit Goram Jason Jarrau, sereya bala bukai.

Dulu agi ari nya, Jamit mega bisi ngabas pengerusak ke nyadi rambau penusah bah tunggal mangka ketegal ujan bangat di SK Sungai Kapit. Iya meli 70 iti bangku plastik dikena nganti barang ke rusak ketegal penusah bah nya.

Iya mega bisi ngabas projek jalai 1.3 km jalai batu, beungkus RM300,000, ari simpang Jalai Sungai Ulu Yong ngagai taba baru Rumah Jandok.

Kandang beberapa hari ke udah, Jamit bisi ditu betemu enggau bala penyukung iya sereta mega bejalai ngabas sekeda projek dipejalai nengah belanja RTP. Kesemua iya, Jamit puas ati enggau semua projek ti digaga memanah. #UtusanBorneo