Header Ads

  • Berita Tebaru

    JKMS ngungkupka RM226.8 juta bantu nengah PS 2018

    Dato Sri Fatimah Abdullah
    Tu mungkur BKK, BOT, Elawin Pengereja Pengawa OKU, Bantu OKU Enda Gawa, Bantu Nyaga OKU enggau ke bukai.

    KUCHING: Perambu Strategik (PS) 2018 ngagai 2020 Opis Pengelantang Pendiau Komuniti Sarawak (JKMS) ngungkupka urung RM226.8 juta enggau penyampau penerima dalam 58,081 setaun, dibanding enggau taun 2017, ke ngerijista urung 57,000 penerima.

    Menteri Opis Pengelantang Pendiau, Komuniti, Orang Indu, Ruang Bilik enggau Pemansang Anak Mit, Dato Sri Fatimah Abdullah madahka setengah ari tagit bantu tu diberi ulih Perintah Besai ke mungkur Bantu Anak Mit (BKK), Bantu Orang Tuai (BOT), Elawin Pengereja Pengawa ke Timpang Pendiau (EPC), Bantu OKU Enda Gawa (BTB), Bantu Nyaga OKU/Pesakit Kronik ke Enda Ulih Angkat (BPT)enggau Bantu Anak ke Dijaga.

    Lalu sebengkah agi bantu ke diungkup nengah Skim Bantu Perintah Menua Sarawak mungkur Bantu Am (BA), Bantu ke Bala Nembiak (Belia enggau Beliawanis tauka BBB) sereta Bantu Penambah, nambah bajet ke di ungkupka ulih Perintah Besai.

    “Ari kededua bantu tu, BOT ari Skim Bantu Perintah Besai mungkur ke pengabis mayuh, iya nya urung RM9.4 juta ke 22,356 penerima.

    “Ba baruh Skim Bantu Perintah Sarawak, baruh Bantu Nambah ngagai Bajet ke udah diungkupka Perintah Nengeri nyaup Perintah Besai, iya nya ke kategori OKU sereta Bantu ke Anak Mit ke diungkupka maya ex-Kepala Menteri sebedau tu, diberi maya niang Pehin Sri Adenan Satem , nyerumba baka ‘top-up’ ngagai bajet Perintah Besai, lalu skim tu agi dipajakka,” ku Fatimah.

    Iya madah munyi nya lebuh bejaku ba aum pengarag berita pengudah bechairmanka aum Perambu Strategik 2018-2020, opis JKMS ti digaga di Wisma Kebajikan ditu,kemari.

    Baruh pechah bajet operasi taun 2018 tu mega (ke kumpulan sasar) bela mungkur Bantu kena Tinggang Penusah ke diberi nyema bisi rumah angus, kemarau, tanah tusur, ampuh bah, ribut sereta sekeda penusah bukai ke ngungkupka urung RM5.2 juta setaun.

    “Enti ungkup tu enda chukup, kitai agi ulih minta ngagai Perintah Besai/Menua, nambah ngagai penyampau kediatu, lalu siti agi geran,iya nya Geran Pemansang Ekonomi.

    “Siti ari pemerat opis tu, iya nya mantu (client) ke produktif nambah pemisi sida iya, baka orang dagang mikro, alai geran nya diungkupka bajet mantu pengabis kurang seribu iku penerima, lalu bajet nya RM6.8 juta,” ku iya.

    Sama bisi enggau ngulu aum media nya kemari, Menteri Muda Komuniti, Datuk Francis Harden enggau Menteri Muda Orang Indu, Ruang Bilik, engga Pemansang Anak Mit, Rosey Yunus.

    BANTU JKMS 2018-2020: (Ari kiba ke kanan) Saadiah, Francis, Fatimah, Rosey enggau Abang Shamshudin benung meda langkar Perambu Strategik 2018 ngagai 2020 ke JKMS.
    Bekait enggau pekara ke sebaka nya mega, Fatimah madahka perambu strategik 2018-2020 tu ngelangkar ‘Roadmap’ JKMS ke timpuh ke panjai.

    Iya madahka tiga strategi betatika iya di ubah laban deka beratika pemujur atur perambu, iya nya ‘Bina Kapasiti Cemerlang, Tingkatkan Program Berimpak sereta Tingkatka Kerejasama Strategik Berimpak’.

    “Tiga strategi tu mega di ubah ngambika JKMS ulih ngamatka visi nyadi sebuah ijinsi pengelantang pendiau ke beprestij besai sereta nyapai pemerat ngangkatka pengelantang pendiau sosio ekonomi komuniti ke bisi pemerat ba pengujung taun 2020,” ku iya.

    Iya mega madahka JKMS ngubah 10 Pemerat Strategik alai empat pemerat besai strategi nya, Pengelantang Pendiau Rama, Pemansang Ekonomi, Ngerai sereta Undang-undang, sereta Ngemutar sereta Pemansang Strategik.

    Kelimpah ari ngaga pemisi servis baka kediatu, JKMS mega ngubah (mengubal) 13 Program ‘Signature’ (program berinovasi baru) kena nyapai 10 pemerat strategik lalu nangkan nya, ngamatka visi sereta japai pemerat opis nya.

    “Program ‘signature’ nyengkaum aktiviti tauka inisiatif ke bekait enggau ngangkatka kapasiti JKMS, pengelantang pendiau rama, pemansang komuniti enggau ekonomi, sereta pengerai enggau undang-undang rama,” ku iya.

    Entara 13 Program ‘Signature’ ke deka digaga dalam timpuh ke sama tauka berenggat nitihka kapasiti opis enggau bajet ke udah dikemendarka, program nya mungkur ‘Program Keluargaku Perihatin Sosio Ekonomi’/Program Warga Emas Begulai enggau Komuniti, Program Simulasi Ngemutarka Bantu maya Tasah, Program Komuniti ke Betatika Penusah Orang Bukai, Program Pemansang Pengelantang Pendiau Orang Dagang Mikro, Program Ngelatih Pengelandik enggau (Pemadanan Kerja) sereta sekeda program bukai.

    Sama bisi ngulu aum media nya kemari, Menteri Pengelantang Pendiau Komuniti, Datuk Francis Harden enggau Menteri Muda Orang Indu, Ruang Bilik enggau Pemansang Anak Mit, Rosey Yunus, Sekretari Mendam Opis Menteri KKKWKPK Dr Saadiah Abdul Samat enggau Direktor JKMS, Abang Shamshudin Abang Seruji. #UtusanBorneo

    No comments

    Post Top Ad