Header Ads

  • Berita Tebaru

    Kaban PBB Meluan besepenemu nyukung Salang ngetanka penuduk maya PRU14

    Datuk Joseph Salang Gandum
    JULAU: Parti Pesaka Bumiputera Bersatu (PBB) Pampang Meluan besepenemu nyukung Kaban Parlimen (MP) Julau Datuk Joseph Salang Gandum bediri ngetanka penuduk nya maya Pengawa Bepilih Besai Ke-14 (PRU14) ti deka datai.

    Chairman sida, Paulus Banyang madah, pengagit sida ke bukai ti ngining bediri ba dia endang enda mujur.

    Kebuah pia ku iya, Presiden Parti Rayat Sarawak (PRS) Tan Sri Dr James Jemut Masing empu dekaka Salang bediri baru ba penuduk Parlimen Julau kelimpah semua ketuai parti komponen Barisan Nasional (BN) ba menua nya bela lantang begulai enggau iya.

    “Tu nambahka pengeka rayat ditu ti agi rindu sereta ngandalka Salang mengkang nyadi pengari rayat sida,” pia ku iya madah maya pengerami begulai enggau rayat ba Rumah Timban Batu 15, Jalai KJD, hari Enam tu tadi.

    Ku Paulus, Salang mujur mandangka diri bejalaika tanggungpengawa nyadi pengari rayat enggau manah kenyau ke udah menang empat kali bediri ari taun 1999.

    “Tang enti sida ke ngining nya nyau dipilih pemesai BN ke bukai bediri ditu, nya enda betul.

    “Kami PBB di Meluan enda diau diri nyema pekara tu nyadi,” ku iya madah terang.

    Iya madah, Salang bisi ati deka badu ngetan penuduk nya tang Masing mengkang ngasuh iya bediri dia.

    “Udah nya, Salang mega besetuju nambahka iya nadai penanggul bukai sereta agi regas bejalaika pengawa nyadi pengari rayat,” pia ku iya madah baru.

    Ngelama tu ku Paulus, Salang udah mayuh mai pemansang ngagai Parlimen Julau.

    “Ba rumah aku empu di Rumah Jana, Batu Matop bela ngasaika pemansang ke dibai Salang,” ku iya madah.

    Ketegal nya iya madah, PBB ti nyadika pengering BN ba nengeri tu deka ngempung bala raban di Meluan enggau Pakan nyaup nyukung Salang ngulihka majoriti undi ti besai serak PRU14 tu.

    Nambahka nya ku iya, rayat di Julau mengkang ngarapka Salang udah tu megai pangku pengawa ke besai ba perintah.

    Iya madah, diatu Salang nyadi Sekretari Besai ba PRS alai awak iya datai ba tikas ke manah agi dalam perintah endang tampak.

    “Nya alai, iya meseti agi nyadi Kaban Parlimen Julau udah tu,” pia ku iya.

    Ba pengerami tu mega, Ketuai Raban Nembiak PRS Pakan, Timothy Julius ba jaku iya madah, pemayuh orang ke datai ba pengerami ti digulu Salang baikka di Meluan tauka Pakan mandangka Salang agi dikerindu rayat dia.

    “Sida ke datai tu ukai semina PRS aja tang mega bisi ari PBB enggau PDP.

    “Laban iya agi disabung PRS, kitai meseti begempung nyaup iya bulih majoriti ke besai ba PRU tu,” ku iya. #UtusanBorneo

    No comments

    Post Top Ad