Header Ads

  • Berita Tebaru

    Kaban PVTR mejah penemu ti dipansutka Ismail Mina

    Mohd Melintang Abdullah
    KUCHING: Kaban Serakup Veteran Soldadu Kor Renjer (PVTKR) mejah jaku dipansutka Chairman Ummah Muslim Cleric, Ismail Mina Ahmad maya forum pengarap apin lama ke udah di Kuala Lumpur ti nyebut semina bansa Melayu aja ngelaban raban penyelawai enggau kominis.

    Presiden serakup nya, Lt Col (R) Mohd Melintang Abdullah madahka ‘ulama’ nya enda nemu nama utai disebut iya lalu iya patut minta ampun ngagai mensia mayuh kelebih agi bala soldadu ke bukai datai ari pupu bansa ti berambunka nyawa sida ngetanka menua.

    “Etnik bukai baka Dayak, Orang Ulu, China, India, sereta etnik Sabah di menua enggau pemerani ngetanka menua kenyau ari jeman penatai Jepun maya Perang Dunya Kedua, timpuh menua siga di Malaya dalam taun 60-an sereta keruga kominis di menua tu,” ku iya ba aum pengarang berita ngerara jaku ti dipansutka ulama ba opis serakup sida, ditu, kemari.

    Kitai bisi pekara nyata, rikod enggau nama bala soldadu ari pupu etnik ti lesi bebadi lebuh ngelaban bala penyelawai enggau munsuh kitai. Bisi sekeda agi idup lalu nyadi bujang berani menua kitai. Pekara ti disebut Mina ba jaku ke dipansutka iya dalam portal berita nasional beberapa hari ke udah endang enda patut sereta ngeleseika semua pengawa ditegika bala bujang berani soldadu kitai,” ku iya.

    Ku Melintang, enda ibuh ditanya lebuh datai ba penaluk sida ngagai menua ngelaban bala penyelawai lalu pemerani bala ketuai ti nguluka sida ngapuska semua penyelawai tu.

    “Mayuh sida ti berambunka nyawa lalu parai ke menua tu ngelaban penyelawai iya nya sida ke datai ari pupu bansa lalu ukai semina Melayu aja. Kitai bebasaka pangku pengawa ulama sereta pengelandik iya dalam bidang iya sereta profesyen dalam pengarap Islam, tang ba runding aku, iya patut belajarka fakta ke betul nyema iya kelalu enda nemu pasal sapa bagi berambunka nyawa lalu ngasuh menua temegah,” ku iya.

    “Kitai bisi rikod sida ti berani ukai Melayu ba pengawa ngetanka menua lalu udah bejalaika pengawa memanah ngagai Malaya lalu udah nya ngagai Malaysia. Kitai bisi penerima George Cross ari raban Iban Traker Awang Rawing ti gawa begulai enggau British maya menua siga di Malaya sereta penerima midul ke bukai baka gelar soldadu British maya jeman nya. Nya alai ba pekara tu, baka ni iya tau madahka bansa bukai nadai gawa ngetanka menua,” ku Melintang.

    Melintang mega bisi mantaika nama sida ke ukai Melayu, ti udah diaku pemerani sereta nerima Seri Pahlawan Gagah Perkasa (SP) enggau Panglima Gagah Berani (PGB) sekumbang 40 taun Perang ngelaban penyelawai di Malaysia.

    Iya nangkan bala bukai sereta sida ti ngembuan penemu baka Mina nyeliahka diri ari nyebut pekara ti besibil enggau soldadu Malaysia, enti nadai bukti.

    Sapit Presiden PVTKR Col (R) Fabian Wong tekenyit seraya madah jaku ti dipansutka Mina balat ngemaruhka raban veteran soldadu ke agi idup sereta sida ke udah midang, nyangka tau angkat ari pendam ninga penerang ti disebut nya.

    Ku iya, dalam siti platun bisi 30 iku personel soldadu, 90 peratus ukai bansa Melayu.

    Lalu bejaku madahka semina bansa Melayu aja gawa ngetanka menua endang ukai pekara ke patut sereta bula.

    Raban veteran enggau aku empu endang nemu semua soldadu di menua tu dekaka Mina minta ampun ba mua mayuh sereta matak baru jaku dipansutka iya, ku Wong.

    Kitai bisi raban soldadu ti nyelai datai ari pupu bansa sereta berani ngelaban ngetanka menua lalu suah agi sida tu ba rintai mua raban ngetanka menua. Gelar ti diterima nyeritaka pemerani diri, ku iya.

    Jaku dipansutka iya chukup sensitif sereta enda manah ngagai raban veteran soldadu ti datai ari bansa bebida sereta gawa ngetanka menua, ku iya.

    VETERAN SOLDADU: Melintang (duduk tengah) begambar begulai enggau Wong (dua kanan) Ratnam (dua kiba) Sharkawi (kiba) sereta kaban PVTKR ke bukai pengudah tembu aum pengarang berita ba opis sida.
    Sekretari PVTKR Major (R) Sharkawi Dawi madahka chukup sinu enggau jaku ti disebut Mina sereta nyeritaka baka ni iya nguluka platun ti tebal agi etnik Sabah ke ngetanka menua sereta munuh beberapa iku kominis lebuh menua siga.

    Tu pekara nyata ke alai bala bakih soldadu datai ari bansa bukai lalu sida gawa begulai enggau bala menyadi bansa Melayu sereta sida nerima basa ba pemanah pengawa diri. Nya kebuah, jaku madahka semina bansa Melayu aja gawa ngetanka menua endang bula, ku iya asa.

    Penyanding Penemu Serakup Veteran India ATM (PERIM) Kolonel (R) Ratnam madahka bisi mega bansa India gawa ngetanka menua sereta nerima gelar ba pemerani sida lalu iya minta perintah nentuka sejarah Soldadu Malaysia deka dipasuk dalam silibus pelajar sereta diajar di sekula.

    “Kitai enggaika penerang ke baka tu dipansutka baru ila sereta ngemaruhka soldadu bansa bukai ti udah gawa suba enggau diatu,” ku iya. #UtusanBorneo

    No comments

    Post Top Ad