Header Ads

  • Berita Tebaru

    Kandang menua bansa Bidayuh mayuh pengelebih

    Datuk Patinggi Abang Johari Tun Openg
    KUCHING: Pengelebih ba sekeda faktor pemadu beguna dalam kandang menua ti diuan bansa Bidayuh, disadang ulih mantu ngemansang sereta nyungkak ekonomi bansa nya sereta kelebih agi nengeri.

    Kepala Menteri, Datuk Patinggi Abang Johari Tun Openg madahka faktor nya nyengkaum peluang dalam betanam betupi,dagang temuai enggau ke bukai ke ulih ngangkatka penatai pemisi kandang menua bansa Bidayuh.

    “Pengelebih kandang menua tu (Bidayuh), iya nya tanah ti ami, infrastruktur ke patut dikemanahka, semak enggau padang bilun sereta palan penyangkai kapal.

    “Tang ke pemadu beguna bansa Bidayuh ngembuan pengereja pengawa ti pandai sereta landik, Bidayuh enti ari sukut ‘ratio’ orang ti pandai sereta landik, sida iya mayuh agi.

    “Lalu enti semua faktor nya dipegulai ka, nya meri pengelebih (ulih ngemansangka kandang menua sereta bansa Bidayuh),” ku iya lebuh dikerandau raban pengarang berita.

    Dulu ari nya Abang Johari ti mega Presiden Parti Pesaka Bumiputera Bersatu (PBB) bejadika Aum Pengari Pampang Tiga Taun Sekali Pampang PBB Zon 3, ti diatur ba Dewan DBNA ditu, kemari.

    Dalam PBB zon 3, bisi enam sitak ke diuan bansa Bidayuh iya nya N.18 Serembu, N.19 Mambong, N.20 Tarat, N.21 Tebedu, N.22 Kedup enggau N.23 Bukit Semuja.

    Nambahka nya bekaul enggau dagang temuai, iya mega madahka ba kandang menua Bidayuh, mayuh palan dagang temuai ke ulih matak temuai datai kelimpah ari ke bisi perubat asal.

    “Enti nuan ke Kuching, Serian, Bau, Lundu nyentuk ke Sematan dalam urung 40 minit bisi Taman Negara nyengkaum ulih nyadi palan pengerai, iya nya endur ti manah perubat terapi,” ku iya.

    Perintah mega udah nemu kandang menua Bidayuh nyadi zon ngemansut buah, baka buah rian lalu ulih dijual ngagai menua tasik.

    “Kandang menua tu (Bidayuh) amat mayuh buah rian tang dini deka nyual. Nya alai lebuh bisi palan ngumpul buah disediaka perintah ari, buah nya ulih di eksport,” ku iya searaya madahka opis betanam betupi moden ti bejalaika pansik pemayuh pun rian ngena teknologi pemadu baru. #UtusanBorneo

    No comments

    Post Top Ad