Kejampatka ngemendar sistem suwa ba tanah NCR ti dikemansang nengah JVC -->
Cari Berita

Advertisement

Kejampatka ngemendar sistem suwa ba tanah NCR ti dikemansang nengah JVC

Admin | beritaiban@gmail.com
January 25, 2018

Henry Kanyan
KUCHING: Seraban 18 iku ketuai komuniti ari Tamin betuaika Chairman Komiti Pemansang Kandang Menua Ulu Oya Pakoh, (ADC) Henry Kanyan dekaka perintah nengeri ngenyampatka agi meri pemendar ngagai sistem suwa ba tanah Adat Bansa Asal (NCR) sida ba pengawa begulai sida enggau dua kompeni pemansang tanah.

Sida udah nganjung perambu ngagai perintah dalam taun 2016,antara bukai pekara minta nengeri tu nyaga pengawa sida ari sebarang pekara ke enda disadang nyadi. Taja pia, nyentuk ke diatu, sida nadai nerima sebarang timbal pasal pekara nya.

Kemari, bala ketuai komuniti tu datai betemu enggau Sapit Kepala Menteri Tan Sri Dr James Jemut Masing sereta Kaban Kunsil Nengeri (ADUN) Tamin, Christopher Gira Sambang mantaika pengirau diri ba opis iya (Masing) di Komplek Masja di Petra Jaya ditu.

Sistem suwa ba tanah ukai pekara baru laban nya udah dikena ba kandang menua Balingian ari pengempu tanah sereta pemaju tanah, ku Masing  madahka sistem tu alternatif ngagai skim inisiatif Kaunsil Penyerakup enggau Pengintu Tanah Sarawak (SALCRA).

Iya mega ngarapka perintah, Opis Menteri Betanam Betupi Moden, Tanah Adat enggau Pemansang Kandang Menua ulih ngemendarka peminta sida (bala ketuai komuniti) sebedau pengawa bepilih besai tu ila.

“18 iku ketuai komuniti minta perintah nyaga sida. Sida enggaika sebarang pekara enda disadang nyadi pengudah sempekat pengawa begulai disain. Bala sida mega dekaka perintah nengeri nyadi saksi ba pengawa nyain sempekat sida nya,” ku iya pengudah nyadi chairman aum begulai enggau bala ketuai komuniti.

Sama bisi datai Ketuai Indu Parti Rakyat Sarawak (PRS) Dato Sri Doris Berodie ti mega Sekretari Politik Kepala Menteri sereta ADUN Pelagus Wilson Nyabong Ijang.

Pengawa begulai nya mungkur 33,000 hektar tanah NCR ke disukat ari baruh Provisyen Seksyen 6 Undang-Undang Tanah Sarawak.

Masing ke mega Presiden PRS madah diri enda ulih mantaika bagi dua buah kompeni nya tang pekara ti udah dipesetuju ungkup taun keterubah nyentuk ke taun kelima, suwa sepenyampau RM350 sehektar setaun enggau pengudah nya, ungkup taun keenam enggau taun ke-30, suwa iya nya RM720 sehektar setaun.

Bala ketuai komuniti nya mega bisi di mengeri tu ngambi bagi dalam konferen NCR ti diberi nama Pemakai Menoa and Pulau Galau sehari tu (24 Januari) di Hotel Imperial ditu.

Kepala Menteri Datuk Patinggi Abang Johari Tun Openg deka bejadika konferen nya urung pukul 3.30 lemai. #UtusanBorneo