Header Ads

  • Berita Tebaru

    Kerejasama staf KKKWKPM, JKMS udah mantaika pemujur

    Dato Sri Fatimah Abdullah
    Kenyau ari taun 2016 nyentuk 2017, opis menteri tu ti ngembuan 818 iku staf udah nerima mayuh gelar ba renggat nengeri Sarawak.

    KUCHING: Opis Menteri Pengelantang Pendiau, Komuniti, Orang Indu, Ruang Bilik enggau Pemansang Anak Mit (KKKWKPM) ti semina bisi 818 iku staf, ukai nyadi penanggul opis nya nyengkaum Opis Pengelantang Pendiau Sarawak (JKMS) nyapai mayuh gelar ba renggat nengeri Sarawak ari taun 2016 nyengkaum 2017.

    Opis Menteri nya, Dato Sri Fatimah Abdullah madah, iya berasai temegah ati, taja pan pemayuh pengereja pengawa enda datai seribu ti gawa ba opis menteri nya, tang opis nya agi ulih nyapai pemujur teulihka gelar di renggat nengeri Sarawak (maya Civil Service Day bedau lama tu tadi).

    “Aku berasai temegah ati laban opis kami, JKMS teulihka pemujur sereta menang sekeda gelar kenyau ari taun 2016 nyengkaum 2017.

    “Siti ari gelar nya, ‘High Performance Team’ ke di ulih raban kami maya Hari Perkhidmatan Awam (Civil Service Day)…tu mandangka Perintah Menua nemu tikas sereta sistem servis JKMS.

    “Aku berasai temegah ati madahka mayuh ari pemesai opis kami baik nya ke gawa ba renggat pelilih menua tauka sitak, orang ke bagas gawa,” ku iya.

    Iya madah munyi nya lebuh bejaku ba aum pengarag berita pengudah ngetuaika aum Batang Perambu Strategik 2018-2020, opis JKMS ti digaga di Wisma Kebajikan ditu, kilah ensana.

    Iya nandu baru madahka enti diperatika skop kereja JKMS, pengawa sida iya digaga nyerumba jaku sempama ari uyut datai ngagai pendam (from the cradle to the grave).

    “Enti diperatika ari penyampau orang ke gawa baruh JKMS, pemayuh sida iya di serata menua Sarawak semina manggai urung 818.

    “Bansa pengawa ke digaga sida, tau dipadah nyema enti bisi orang angus, bisi tasah nyadi, sida tu (pengereja pengawa JKMS) udah kin dulu, enda ngira nya malam hari tauka ujung minggu, asal sida dipadah, bisi bulih pemadah, sida lalu terus ngesahka pekara ti nyadi.

    “Taja pan penyampau pengereja pengawa nya enda mayuh sereta penyampau skop pengawa ke digaga sida iya, aku muji penyulut pengawa sida iya,” ku iya.

    Taja pia, iya nandu baru madahka, JKMS mega napi pengelemi dalam tusun rintai pengawa sida iya.

    “Kami ngaku, kadang-kadang kami bisi pengurang mega, nya kebuah berat endar kami ngaga Batang Perambu Strategik 2018-2020 laban kami deka nyapai serta majakka pemanah pengawa kami, sereta nyadi sebuah opis ke beprestasi tinggi.

    “Kami deka majakka penegap kami agi bisi, lalu dalam timpuh nya mega, ngemanahka agi pengurang kami, ukai semina naka dalam opis tu aja, tang mega nengah gempung strategic begulai enggau opis tauka ijinsi bukai,” ku iya ke madahka pemerat sida iya nengah program strategic bansa tu, ngambika servis sereta sistem (delivery) sida iya majak manah. #UtusanBorneo

    No comments

    Post Top Ad