Kes bunuh niang Bill Kayong deka dipechara baru kena 12 Februari -->
Cari Berita

Advertisement

Kes bunuh niang Bill Kayong deka dipechara baru kena 12 Februari

Admin | beritaiban@gmail.com
January 24, 2018

Kes bunuh aktivis rama, niang Bill Kayong.
MIRI: Kort Tinggi netapka 12 Februari tu ila mendingka baru pengerembai kes apil bekaul enggau pengawa ngelepas tiga iku sida ti disangka dalam kes bunuh aktivis rama, Bill Kayong.

Penolong Kanan Pendaftar Md. Syafique Md. Hilmie mega meruan netapka 19 enggau 20 March nyadi hari bulan tentatif mendingka penerang ‘bela diri’ orang disangka keterubah dalam kes tu, iya nya Mohamad Fitri Pauzi.

Dulu agi ari nya, Timbalan Pendakwa Raya (TPR) Mohd Fuad Abdul Aziz madah ngagai Syafique ke alai kes apil bekaul enggau pengawa ngelepas orang ti disangka kedua, ketiga enggau keempat dalam kes nya deka dipending di Kort Apil Kuching kena 5 Febuari 2018.

Mohamad Fitri Pauzi, 30, ari Jalai Dawai 1 Pujut 4D ditu udah didawa nitihka Seksyen 302 Kanun Keseksaan laban penyalah munuh ti mai pemarai niang Bill Kayong.

Nyema dituku salah, iya tau kena tinggang ukum mati mandatori.

Penyalah tu didawa dikereja orang disangka urung pukul 8.20 pagi, 21 Jun 2016 di simpang lampu trafik besemak enggau Palan Bebelika Barang Emart, Jalai Kuala Baram Bypass ditu.

Kena 6 Jun tu tadi, Akim Ravinthan N.Paramaguru beratika raban ti nawa mujur mantaika kes prima facie ngagai Fitri dalam kes tu.

Ba hari bulan ke sama, iya mutuska orang ti disangka Lie Chang Loon, Chin Wei Chung enggau Datuk Stephen Lee Chee Kiang ke nyadi orang disangka kedua, ketiga enggau keembas dilepas ari tuduh bepakat munuh Bill Kayong pengudah nadai bukti nyata ti ulih ngait sida enggau penyalah ke didawa.

Ba penyalah nya, Lie, 38, ari Taman Pin Fook; Chin, 51, ari Lorong 5 Krokop enggau Datuk Stephen Lee, 45, dari Jalan Woodhouse, Tanjong Lobang ditu bela didawa nitihka Seksyen 109 Kanun Keseksaan sereta dibacha begulai enggau Seksyen 302 kanun sama ke mega ngemai ukum mati, enti dituku salah.

Ba kes tu, ketetiga orang disangka udah dituduh bepakat enggau siku agi ti agi lepas ngupah Mohamad Fitri Pauzi munuh Bill Kayong.

Sida didawa ngereja penyalah nya ba jam enggau endur ke sama.

Kort udah nya minta Fitri agi ditan di Penjara Pusat Miri seraya nganti hari bulan nya. #UtusanBorneo