Header Ads

  • Berita Tebaru

    Kes orang ti nadai pengentap pendiau kurang ba taun 2017

    Dato Sri Fatimah Abdullah
    KUCHING: Kes orang ti nadai pengentap pendiau bisi kurang ba taun 2017 nyema dibanding enggau taun 2016.

    Menteri Pengelantang Pendiau, Komuniti, Orang Indu, Ruang Bilik enggau Pemansang Anak Mit (KKKWKPK) Dato Sri Fatimah Abdullah madah, kes tu nyadi ketegal sekeda faktor baka penanggul ke ditapi sida enggau diri sebilik, nadai pengawa sereta sekeda nya bisi kes sakit mental.

    “Baka taun 2016, penyampau orang ke nadai pengentap pendiau di serata nengeri Sarawak, bisi dalam 40 kes, alai lebuh operasyen nya dipejalaika ba empat bengkah kandang endur, penyampau ke kena tangkap iya nya di Kuching (7), Bintulu (4), Miri (13) enggau Sibu (16) lalu ba taun 2017, turun ngagai 30 kes aja.

    “Entara kebuah mayuh sida tu nyadi orang ti nadai pengentap pendiau, pengudah disidi sereta ditanya, mayuh bekait enggau penanggul bisi charut enggau sida sebilik, nadai pengawa sereta sekeda nya sakit mental,” ku Fatimah.

    Iya madah munyi nya ba aum media pengudah ngetuaika aum media bekait enggau Strategi sereta Bajet Opis Majlis Pemansang Pengawa Rama, di opis menteri nya di Baitulmakmur ditu, kemari.

    Iya nandu baru madahka, beratika taun 2017, kes orang ti nadai pengentap pendiau, enti diperatika baka ke ditangkap di Miri, ukai orang asal pelilih menua nya.

    “Di Miri, sida ke kena tangkap, sekeda nya ukai orang asal pelilih menua nya, tang ditemu sida tu datai ari Kapit, Sibu nyengkaum orang Miri empu.

    “Lalu penyampau orang ti nadai pengentap pendiau ke kena tangkap dalam operasyen ti digaga dalam taun 2017,di Sibu bisi 16 kes, Kuching (4), Miri (7) enggau Bintulu (3) iya nya bisi dalam 30 iku,” ku iya.

    Iya nandu baru madahka bepelasarka taun 2016, profil orang nadai pengentap pendiau tu, pengudah ditasat, ke mayuh ari pupu bansa Cina, Melayu enggau Iban, lalu sida tu sekalika di anjung pulai baru ngagai sida sebilik, tauka dianjung ngagai palan orang ti nadai pengentap pendiau di Kuching, Anjung Singgah di Jalai Green tauka enti sida nya ditemu bisi sakit mental, deka dianjung beperesa mental ba sepital.

    Pengawa bejalaika operasyen orang kampar tu ari KKKWKPK dipunka dalam taun 2016, lalu menteri ari opis menteri nya entara raban KKKWKPK ke sama bela bejalaika operasyen nya. #UtusanBorneo

    No comments

    Post Top Ad