Header Ads

  • Berita Tebaru

    Ketuai raban bansa patut chakah berandau enggau pengari rayat

    Dato Sri Nancy Shukri
    KUCHING: Menteri ba Opis Menteri Besai Dato Sri Nancy Shukri minta tuai rumah sereta ketuai raban bansa patut chakah ngempit sereta berandau enggau bala ketuai parti tauka pengari rayat.

    Iya madahka ngena chara nya bala ketuai ulih ngenataika penanggul tauka sebana ke ditapi rumah panjai, genturung pendiau tauka nembiak redak ngagai piak ke bekaul.

    “Tuai rumah sereta ketuai raban bansa ba sesebengkah genturung pendiau tauka rumah panjai ngambika seruran berandau enggau bala ketuai tauka pemesai parti ngambika bantu enggau pekara pemadu diguna ulih dikenataika.

    “Baka tu, suba kita minta digaga balai raya diatu udah bisi...jalai alun ke rumah panjai suba nadai tang diatu udah bisi.

    “Nya alai kita patut terus madahka ke aku ngambi aku ulih datai lalu mending, berandau enggau meda ke diri empu nama utai ke kurang sereta penanggul kita, ari tu aku ulih mutarka iya tauka mai ngagai ejensi tauka opis menteri ke ulih mantu,” ku iya.

    Nancy ti mega Kaban Parlimen Batang Sadong mansutka pekara nya lebuh bejaku ba Program Randau Pemimpin Bersama Rakyat enggau bala peranak rumah panjai Tuai Rumah Gubil, Kampung Benat Hulu, di Simunjan, kemari.

    Iya ti meri penerang nya lebuh ti ngenang surat peminta ke diterima iya ti madahka program turun padang nya ulih meri peluang ngagai iya meda endur ke patut dikemeratka dulu.

    Program turun padang ku iya, meri peluang ngagai iya nerangka ngagai peranak menua nama pekara ke nyadi nyema bisi projek ti laun tauka lubah tauka bisi penanggul.

    “Bisi projek ti nengah proses ke udah ditetapka perintah baka ari segi atur. Ambika banding projek besai lalu patut bisi peminta ke dipejalaika ejensi ti bejalaika projek nya.

    “Nya alai amat beguna ba aku turun padang sereta nerangka ngagai rayat lebih agi ngagai sida ke ngengkahka penanggul nya dalam media rama laban sida patut dipadahka prosedur enggau proses projek nya dipejalaika,” ku iya seraya madahka projek Jalan Perhubungan Desa ti mungkur projek Jalan Benat ke tembu ba taun 2016 dibaruh ungkup belanja ke dipinta iya.

    Lebuh ke bejaku, Nancy mega meransang peranak ba menua nya ngambika betanamka kelapa sawit berindik ari ke bisi peminta.

    Berebak enggau tu Nancy bisi meri awak nemuai ngabas seiku orang ke sakit lalu meri pemeri kerusi roda enggau ubat.

    Kelimpah ari nya, bisi sepenyampau RM30,000 ungkup belanja dikemendarka nengah Projek Mesra Rakyat (PMR) dikena ngemanahka balai raya, ke guna bukai sereta dikena bejalaika aktibiti tauka program ti nguntungka peranak Kampung Benat Hulu.

    Lalu sepenyampau RM30,000 diungkupka dikena bejalaika tuju ti sama ba Kampung Benat Hilir. #UtusanBorneo

    No comments

    Post Top Ad