Header Ads

  • Berita Tebaru

    KGBS enda setujuka DLP dikena dalam PPSMI

    Ahmad Malie
    KUCHING: Gerempung Pengajar Bumiputera Sarawak (KGBS) ngenyemaka Program Dwibahasa (DLP) baka ti nukar ‘kulit’ enggau ‘mua’ Pengajaran dan Pembelajaran Sains dan Matematik dalam Bahasa Inggeris (PPSMI).

    Presiden Gerempung Pengajar Bumiputera Sarawak (KGBS), Ahmad Malie madahka gerempung nya sebedau  tu endang enda setuju DLP dipejalaika laban tuju isi sereta tuju program nya sama enggau PPSMI.

    “KGBS kenyau ari pun mantah perambu pejalai DLP ketegal nya ‘program pendua’ enggau program nangkan ngagai Program PPSMI ti dipejalaika sebedau tu.

    “Enggau jaku bukai, KGBS ngenyemaka program DLP tu baka nukar ‘kulit’ enggau ‘mua’ PPSMI, laban isi enggau tuju iya sama enggau PPSMI.

    “Nya kebuah KGBS terus mantah enggau rasional iya, nya udah ngelanggar Akta Pendidikan sereta Perlembagaan 152 ti netapka Bahasa Malaysia (BM) nyadi jaku ti dikena enggau jaku pelajar dalam Sistem Pelajar menua kitai,” ku iya madahka pekara nya ngagai Utusan Borneo.

    Nambahka nya program DLP nya ku KGBS, baka nyadi ejen ti ngikis BM ti pengujung nya ulih nyadi ‘bahasa picisian’ ba menua diri ketegal program nya dikena ngenegapka Jaku English (BI) ba raban nembiak diatu lebih agi rayat Malaysia jemah ila.

    KGBS bepenemu deka ngenegapka BI ukai nengah baka program DLP.

    Program DLP tu ukai agi dikena ngenegapka BI tang ‘munuh’ tanggungpengawa BM baka ti ditulis dalam Akta Pendidikan enggau Perlembagaan 152, ku KGBS.

    “Taja pia, KGBS enda kala ngenggaika pemesai guna BI dalam gaya pengidup jeman diatu, tang ukai reti iya kitai patut ngerumbak sistem ke udah disediaka.

    “Nya alai, nyema perintah nengah Opis Menteri Pelajar Malaysia (KPM) deka ngenegapka BI bala nembiak, KGBS lebih setuju sereta nyukung program ke enda ngemaruhka martabat Bahasa Malaysia dalam sistem pelajar kitai.

    “Nya kebuah dalam penerang KGBS sebedau tu, pengelemi bala nembiak dalam BI ukai bepun ari sistem jaku ke dikena tang lebih ngagai kebuah bukai,” ku iya ngarika KGBS.

    Nitihku Ahmad, KGBS sebedau tu kala meri penemu sereta minta KPM ngambika bejalaika pansik enggau holistik tang nyentuk diatu enda kala diayanka pasal pansik nya.

    Tang program nya terus dipejalaika taja bisi timbal ti enda manah ari mayuh piak.

    Bepelasarka berita Bernama, di Padang Terap apin lama, Menteri Pelajar Datuk Seri Mahdzir Khalid madahka opis menteri iya ngemendarka penambah 126 sekula di serata menua bejalaika DLP taun 2018.

    Iya madahka sekula nya dikemendar pengudah beratika semua sekula nya udah nitihka kriteria ti dikemeratka KPM, bekaul enggau program nya. #UtusanBorneo

    No comments

    Post Top Ad