Header Ads

  • Berita Tebaru

    KKKWKK, JPNIN deka besaup ngemujurka program RIMUP

    Dato Sri Fatimah Abdullah
    KUCHING: Opis Menteri Pengelantang Pendiau, Komuniti, Orang Indu, Ruang Bilik enggau Pemansang Anak Mit (KKKWKK) deka nempa kerejasama enggau Opis Penyerakup Integrasi Nasional (JPNIN) ngemujurka program RIMUP (Rancangan Integrasi Murid Untuk Perpaduan).

    Menteri opis nya, Dato Sri Fatimah Abdullah madahka program nya nyadi pelasar enti kitai deka nyapai penyerakup, ke enda tau enda bepun ari rebak nembiak.

    “Pemerat bekaul enggau penyerakup bepun ari umur kitai ke agi biak, laban enti bala nembiak dipatih baka nya, sida nyentuk ke besai ila bebasa sereta beratika pemesai penyerakup,” ku Fatimah madah pengudah nyadi chairmanka aum media begulai enggau JPNIN ke betuaika Direktor Opis nya,Diwana Azool enggau sekeda pemesai bukai.

    Iya nandu baru madahka enti nunda, program tu kala dipejalaika suba tang ke sekali tu, kerejasama ngaga 12 program nya nyengkaum Opis Pelajar Sarawak (JPNS) deka nyadi ‘tulang belakang’ JPNIN empu.

    “Tagit kami nembiak sekula…Sekeda sekula ngembuan sebansa aja ke tebal agi ari orang bukai, lalu sebansa sekula agi, penyampau nembiak ari pemayuh pupu bansa sama rata.

    “Begulai enggau pangan diri berat ke kaul sereta ngembuan penemu ke manah bekait enggau penyerakup, baik nya ba sekula primeri tauka sekondari.

    Iya nandu baru, iya madahka program tu deka begunaka wang turu ari perintah menua dikena ngatur program tu kelebih agi beratika rebak pelapis kitai sepenemu enggau pangan diri, ke ngelala adat pesaka, jaku, serta pengarap bansa bukai, ku iya.

    “Dua belas program deka diatur di serata menua Sarawak ba 2018, iya nya siti program ti manah ke bala nembiak kitai, laban nengah program nya sida iya mereti sereta nemu pasal adat pesaka, jaku, pengarap bansa bukai, nya ke beguna amat,” ku iya.

    Program RIMUP ke diatur kededua buah ejensi tu ila deka mungkur mayuh macham aktiviti ke merindang sida, ngambika bala nembiak ari bemacham pupu bansa tu belajar ngelala pangan diri.

    “Dalam program tu, mayuh aktiviti ke merindang ati deka diatur, ambika chunto, bala nembiak ulih ngaga lumba enggau main, pengawa pemandang pasal adat pesaka, pemakai enggau jaku pupu bansa bukai,” ku iya.

    Sama bisi ngulu aum media nya kemari, Menteri Muda Pengelantang Pendiau Komuniti, Datuk Francis Harden, Menteri Muda Orang Indu, Ruang Bilik enggau Pemansang Anak Mit, Rosey Yunus, Sekretari Mendam KKKWKK, Dr. Saadiah Abdul Samad enggau Direktor JPNIN, Diwana Azool. #UtusanBorneo

    No comments

    Post Top Ad