KKLW deka mutarka penanggul sistem bekal ai di Long Bedian -->
Cari Berita

Advertisement

KKLW deka mutarka penanggul sistem bekal ai di Long Bedian

Admin | beritaiban@gmail.com
January 24, 2018

Datuk Alexander Nanta Linggi
Opis menteri nya deka berandau enggau JBALB ngambika ulih mutarka penanggul sistem bekalan nya enggau lengkas.

MIRI: Opis Menteri Pemansang Menua Pesisir Enggau Kandang Menua (KKLW) deka ngatur randau silik agi enggau Opis Bekal Ai Menua Pesisir (JBALB) bekaul enggau penanggul sistem bekal ai di Long Bedian ke diatu. 

Sapit Menteri iya, Datuk Alexander Nanta Linggi ti ngatur pejalai gawa ngagai Long Bedian Hari Satu tu tadi begulai enggau injinir KKLW ari opis pampang nengeri tu, madahka kededua raban deka ngiga pemutar lengkas mutarka penanggul ai ke nyadi di Long Bedian.

“Peranak Long Bedian udah sebana pasal penanggul ai nya sebedau tu lalu tuju pejalai aku kena pagi Hari Satu ngabas gaya sistem bekal ai dia seraya aku ngemai injinir KKLW ngiga chara mutarka penanggul nya.

“Randau udah diatur lalu perambu mega udah digaga raban JBALB ti diketuaika Menteri Muda Bekal Ai Menua Pesisir (Nengeri Sarawak) empu, Liwan Lagang ngarika perintah nengeri, ngambi kitai ulih mantu peranak di Long Bedian mutarka isu nya,” ku iya madah ngagai pengarang berita ditu, lemai kemari.

Bela bisi nyempulang Nanta enggau Liwan rambau pejalai gawa sehari nyentuk ngagai Long Bedian iya nya Kaban Kunsil Nengeri (ADUN) Telang Usan, Dennis Ngau.

Rambau pengerami makai lemai peranak Long Bedian ti diatur dalam bulan Disember nyin tadi, Serakup Rama enggau Pengelantang Komuniti Long Bedian, isu bekal ai beresi ngagai peranak di kandang menua nya ti suah betapi enggau penanggul suntuk ai.

Nanta mega nerangka KKLW semina bejalaika pengawa ngaga loji meresi ai enggau sambung paip besai iya (dalam tanah) aja dataika kereja berat nya tembu digaga, sebedau diserah ngagai perintah nengeri Sarawak ti deka diserah ngagai JBALB.

“Ukai kitai deka lepas tangan tang iya udah diserah ngagai JBALB (bejalaika pengawa ngintu enggau ke bukai), taja pia aku deka naka ulih mantu,” ku iya besemaya rambau pengerami makai lemai nya lalu ngamatka semaya diri, laban pengeran iya mantu peranak di kandang menua pesisir dia. #UtusanBorneo