Header Ads

  • Berita Tebaru

    KKM deka nambahka penyampau lutur di nengeri tu

    DEKA NAMBAHka PENYAMPAU LUTUR: Dr Helmi berandau enggau siku pesakit indu sepengudah nyuaka hamper Taun Baru China maya program nya, kemari.
    Naka ke diatu bisi 4,800 iku lutur pakar udah diagihka gawa ba semua sepital nyengkaum di Sabah enggau Sarawak.

    MIRI: Opis Menteri Pengerai Malaysia (KKM) deka nambahka penyampau tubuh lutur pakar enggau lutur bukai berenggat dikena nampung peminta pesakit di nengeri tu.

    Sapit Menteri Pengerai, Dato Seri Dr Helmi Yahaya madah naka diatu bisi 4,800 iku lutur pakar udah dianjung gawa di semua sepital nyengkaum di Sabah enggau Sarawak.

    “Kitai mega udah neritka atur ngambika bala lutur pakar ti baru pas tu dianjung gawa di Sabah enggau Sarawak lalu penyampau sida tu ngaul 600 iku lutur pakar enggau lutur bukai,” ku iya rambau aum pengarang berita ditu, kemari.

    Ku Helmi, ketetiga sepital besai di Sarawak ngaul Sepital Besai Kuching, Sibu enggau Miri bela udah bisi lutur pakar.

    “Kitai sedarka penanggul suntuk lutur pakar di serata menua, nya kebuah opis menteri seruran gawa nambahka penyampau tubuh lutur pakar berenggat,” ku iya.

    Miri empu ku iya, bisi 15 lutur pakar major seraya ke bukai pakar minor, taja pia, perengka guna di sepital tu patut diangkatmanah.

    “Kitai udah merambu satu blok tambah mungkur 324 katil ungkup wad perubat berindik ari penyampau tubuh pesakit ditu mega majak nambah,” ku iya nerang.

    Ku iya nambah, opis menteri mega deka ngangkatmanahka perengka guna klinik ke bisi di kandang menua pesisir Sarawak nyengkaum klinik ti udah kelalu lama sereta jai.

    “Semua klinik ti digaga enggau papan deka diangkatmanah ngambika palan nya tau meri servis ungkup indu betubuh bisi, indai enggau anak mit sereta pesakit pulai hari,” ku iya.

    Ku Helmi, diberi nama Klinik Kesihatan (KK) Tahap 7 ti deka digaga berenggat di menua pesisir nitihka peminta peranak di kandang menua nya.

    Dulu agi ari nya, Helmi udah bejadika Majlis Ramah Mesra bersama Ahli Lembaga Pelawat Hospital enggau Panel Penasihat Klinik Kesihatan (PPKK) Zon Utara.

    Berebak enggau program nya, lima buah sepital nerima agih belanja penyampau RM10,000 sereta 41 buah KK nerima RM5000 ungkup aktiviti PPKK.

    PPKK udah dimun dalam taun 1995 dikena nerenakka kerejasama rat entara komuniti enggau raban ngintu pengerai di palan pengerai ti pulaika pemaik pengerai komuniti di kandang menua nya.

    Nyauka 90 peratus KK di serata menua udah numbuhka PPKK lalu bisi 14,665 iku di serata menua bepalan di 856 buah KK.

    Sama bisi datai Sapit Direktor Pengerai Nengeri (Perubat), Dr.Kamarudin Lajim, Sapit Direktor Pengerai (Pengerai Mensia Mayuh), Dr.Nordin Salleh, sereta Chairman Begulai Dr.Veronica Lugah enggau Dr.Jack Wong Siew Yu. #UtusanBorneo

    No comments

    Post Top Ad