Header Ads

  • Berita Tebaru

    KM deka automatik nyadi presiden PBB, ku Asfia

    Datuk Amar Mohd Asfia Awang Nassar
    KUCHING: Pangku pengawa presiden Parti Pesaka Bumiputera Bersatu (PBB) enda dikerebut ketegal pekara nya udah ditetap ba Genteran 15(7), Konstitusyen Nengeri.

    Mansutka pekara nya, Speaker DUN Datuk Amar Mohd Asfia Awang Nassar nambah PBB enda baka parti bukai ke alai pangku pengawa raban ketuai nitihka penetap Konstitusyenal Nengeri.

    “Pengudah kepala menteri dichiri nengah konstitusyenal Nengeri, kepala menteri nya deka ‘automatik’ nyadi presiden PBB nengah Genteran 15 (7).

    “Iya automatik nyadi presiden parti ke alai pangku pengawa nya enda dipekit sereta enda ulih dilaban. Pekara tu enda bisi ba parti bukai lalu unik ba PBB,’ku Asfia.

    Iya mansutka jaku nya lebuh dikerandau pengudah ngulu aum Komiti Pengawa Bepilih PBB di Indu Opis PBB, Jalai Bako ditu, kemari.

    Ku Asfia ke mega Chairman Komiti Pengawa Bepilih PBB rambau Gempuru Besai PBB bulan Februari tu, kepala menteri dichiri Gabenor nengah Konstitusyen Nengeri ari raban DUN ti diasaika iya (Gabenor) ngembuan sukung majoriti ba dewan.

    Ba sentang dua pangku pengawa sapit presiden parti, Asfia madah sigi pinta kepala menteri enggau Ahli Majlis Tertinggi (MKT) PBB kededua sapit kepala menteri deka nyadi sapit presiden.

    Enggau nya nyata diatu Datuk Amar Douglas Uggah (PESAKA) enggau Datuk Amar Awang Tengah Ali Hassan (Bumiputera) nyadi sapit presiden.

    Iya netap pangku pengawa presiden, sapit presiden, Ketuai Bagi Nembiak enggau Ketuai Orang indu enda dipekit ba Gempuru Besai PBB

    Nitihka penerang Asfia, pom ngerijista diri bepekit ngerebut penuduk ba PBB meseti diterima komiti kena 1 Februari 2018 jam 2 lemai.

    POM PENGAWA BEPILIH PBB: Asfia(dua kana) beratika pom pengawa bepilih ungkup gempuru Besai PBB ti deka diatur ba bulan Februari tu. Bela dipeda (ari kiba) Bell, Susan, Awang Bemee, Hasidah enggau Awang Bujang.
    Rintai ketuai dalam parti ti bisi pengeran ngerebut sekeda penuduk dalam parti disadang ditemu kena 2 Februari 2018, ku Asfia seraya madah pangku pengawa Senior mandal presiden, mandal presiden enggau kaban MKT disadang dipekit maya nya.

    Ngenang sentang perambu ari kaban parti pampang Miri ti dekaka pangku pengawa mandal kanan presiden dibuai, Asfia madah pekara nya diperatika enggau silik lalu deka nganti sekalika mengkang bisi jaku ansak ke sama ari pampang bukai.

    Ku iya, enti bisi agi jaku ansak dekaka penuduk nya dibuai, konstitusyenal parti deka ngempuru semua penerang lalu disua ngagai presiden sereta MKT ngambi diberi pemendar dipejurai rambau gempuru besai.

    “Ubah ba konstitusyenal ulih digaga nengah Genteran 34 enti dipesetuju lalu deka dipejurai ba gempuru besai parti.

    “Enggau nya, kitai nganti sekalika bisi jaku ansak ke sama ari pampang bukai ke alai kitai mega nyadang engka bisi pampang bukai dekaka pekara tu dipejurai enggau nenak agi,’ku iya.

    Iya madah penuduk nya (mandal kanan presiden) dituku nengah Genteran 14 Konstitusyen PBB lalu nyadi tanggungpengawa konstitusyenal komiti mai pekara nya ngagai renggat ke tinggi agi.

    “Gempuru besai parti bisi kuasa ngaga ubah ba konstitusyenal parti,’ku Asfia.

    Bela ngulu aum kemari Eksekutif Sekretari PBB Datuk Awang Bujang Awang Atek enggau kaban komiti pengawa bepilih iya nya Dato Awang Bemee, Sharifah Hasidah, Susan Anding enggau Bell Bernard Aggan. #UtusanBorneo

    No comments

    Post Top Ad