Header Ads

  • Berita Tebaru

    Komuniti Dayak diansak ngemansangka tanah NCR

    Baba Emperan
    Tanah nya tau endur bejalaika pengawa betanam betupi baka nanam lada, sawit, getah, chabi, bumai enggau ke bukai nyengkaum nupi manuk.

    MIRI: Komuniti Dayak ditu diansak enda nejuka tanah sida pia aja, tang dikena endur bejalaika pengawa betanam betupi baka nanam lada, sawit, getah, chabi, bumai enggau ke bukai, nyengkaum nupi manuk.

    Jaku tu dipansutka Presiden Pemansang Dayak (PD) Baba Emperan ti madahka komuniti Dayak ditu endang tebilang enggau pengawa betanam sereta nupi manuk.

    “Aku deka minta semua kaban bansa Dayak ditu ke bisi tanah puang, ngereja pengawa betanam betupi. Sida ke bisi tanah Adat Bansa Asal (NCR), tu mih maya berengkah ngemansangka nya,” ku iya.

    Ku iya nambah, aktiviti betanam betupi ulih nambahka asil pemakai di nengeri tu, lalu ulih ngurangka import pemakai.

    “Dikena nentuka Dayak ngemansangka tanah sida nengah pengawa betanam betupi, perintah meseti nyendiaka sida ti deka nyadi pedagang enggau mayuh bengkah tulung dikena ngepunka dagang diri,” ku Baba.

    Iya mega ngarapka pengudah jalai besai Pan Borne tembu ila, komuniti Dayak di serata menua Sarawak ulih nyual asil betanam betupi sida.

    Chairman PD Pampang Julau, Semana Sawang mega sepenemu enggau peminta Baba, seraya nambah, taja pan rega lada enggau sawit bisi nurun, aktiviti betanam betupi patut seruran dipejalai laban orang bukai ti deka teulihka penguntung ari pengawa nya dalam timpuh panjai.

    “Ambika chunto di Julau, lada, sawit enggau chabi antara utai tanam ti suah ditanam. Bisi maya rega nurun, tang komuniti Dayak patut terus nanam nya laban tebal agi utai tanam tu bisi peminta tinggi,” ku Semana.

    Iya mega ngarapka perintah ulih nyikap aktiviti betanam betupi di Julau enggau kilang memproses tauka ejen nyual di Julau ke deka meli produk mata terus ari pekebun, orang bumai Dayak, memproses lalu nyual ngagai makit luar di nengeri sereta menua tu.

    “Tu deka meri penguntung nyema bisi kilang memproses enggau ejen nyual dipadu perintah ti ulih mantu orang bumai menua tu nyual asil sida,” ku iya nambah.

    Chairman pampang PD Seman Agan mega bisi bekunsika penemu iya, ke alai tebal agi bansa Dayak bepanggai pengidup ba pengawa nanam bemacham bansa utai tanam enggau nupi manuk.

    “Ari pengawa ngaul diri ba betanam betupi, enggau belanja tauka bantu ari perintah, peranak Selangau ulih nyungkak sosio-ekonomi lalu tama ngagai makit luar.

    “Aku mega ngarapka perintah ulih nyediaka belanja ngagai pengawa betanam enggau betupi tauka anak ikan ungkup akaukultur, ngambika raban orang betanam betupi tetangkupka makit pemakai tasik mega,” ku Seman. #UtusanBorneo

    No comments

    Post Top Ad