Header Ads

  • Berita Tebaru

    Kunteriktor ngaga PBH meseti bejalaika pengawa memanah

    Datuk Seri Tiong King Sing
    BINTULU: Kaban Parlimen (MP) Bintulu Datuk Seri Tiong King Sing meri lalau ngagai bala kunteriktor ti udah diberi pemendar ngaga Jalai Besai Pan Borneo (PBH) sereta ngintu jalai ngambika bejalaika tanggungpengawa sida enggau memanah nitihka atur dalam kunterik.

    Nyema sida enda bejalaika pengawa nitihka pematut, iya udah minta Opis Kereja Raya (JKR) ngambi ngetanka bayar sida nyentukka kereja sida tembu digaga.

    Bejaku ngagai pengrang berita di opis iya, Tiong madahka iya bisi ngatur baum khas enggau JKR sereta kunteriktor ditu muakka pagi ti dipejalai pengelama empat jam.

    Ku iya madah, aum tu deka mekuh ngagai pekara bekaul pengelikun penguna jalai alun, lampu, tanda jalai, jalai ti lichin enggau luchak ketegal ari projek PBH semanjai Bintulu-Miri enggau Bintulu-Sibu.

    Ku iya nambah, lampu patut disediaka dalam tetiap lima meter ti nundaka atur ke udah ditetapka diatu.

    “Aku udah madah ngagai bala kunteriktor ngambika enda meri mayuh dalih, semina titihka kunterik lalu anang madahka aku nadai kompeni ti enda nyual lampu tanda tisi jalai. Nyema sida enda ulih, suaka aku duit aku ulih ngaga order ke sida,” ku iya nyemetak.

    Bekaul jalai ti lichin sereta luchak, piak JKR udah ngaga peminta ngambika jalai nya diberesi enggau naka pengelengkas dalam timpuh seminggu.

    “Aku deka nanya Opis Perengka Pengangkut Darat (JPJ) ngambika meresa, sereta nyaman perengka pengangkut ti mai lebih pemerat, laku tu ungkup pengelikun penguna jalai alun,” ku iya.

    “Bejaku sentang lubang di jalai alun, aku udah madah ngagai sida aku enda ulih bebatak asur ngagai dalih ke diberi, sida kunteriktor meseti beratika pekara tu lalu dalam projek ngaga Lebuhraya Borneo Utara (LBU) sida udah besemaya ngagai mensia mayuh deka ngulihka kunteriktor kelas pertama, tang naka ke diatu dipeda aku bala kunteriktor ti ‘nadai kelas’ pan bulih kunterik.

    “Ungkup kunteriktur ‘nadai kelas’, LBU patut nyaut kediri nama pengelemi sida,” ku Tiong.

    Lebuh aum nya, iya madahka udah besetuju iya nya seminggu sebedau Taun Baru China, semua lubang sereta pengawa nyeruri ke bukai udah tembu.

    Ku iya nambah, musim pengujan tu enda ulih nyadika dalih lalu tu enda ulih diterima sekali laban taja ujan sekali pan pengawa nyeruri ulih digaga ba serak ti keterubah.

    Besrimbai enggau nya, semua perengka ti diguna kena pengawa nyeruri meseti ti bisi kualiti nitihka standard.

    “Anang ngena perengka ‘kong kali kong’, tang kena perengka ti bekualiti lebuh bejalaika pengawa nyeruri,” ku Tiong.

    Iya mega madah ejensi perintah besai enda tau lemi ati enggau kunteriktur ti ngaga penyai ngagai sekeda perengka guna lebuh ti bejalaika pengawa.

    “Sebedau ngaga jalai, sida patut ngalihka sekeda perengka guna nya dulu, lalu nama kebuah sida enda ngaga pengawa nya dulu,” ku iya.

    Maya aum nya mega iya udah mansutka isu bekaul kelebat ti bulat ke enda engkeman dikena lalu LBU udah madah nyema ngena kelebat ti besegi tu embar rega ba sida.

    “Ba aku, tu ukai saut nya, nyema kita ngena kelebat bulat, lalu enda entu manah nama reti ngena nya sereta tu semina deka muai duit mensia mayuh. JKR udah besetuju deka nyeruri enggau nadai minta bayar ari perintah,” ku Tiong.

    Iya madahka ukai perintah Barisan Nasional (BN) ti patut disalahka sentang pekara tu, tang sida kunteriktor sereta konsultan ti patut disalahka laban sida enda madah ngagai perintah pekara ti manah tauka patut digaga.

    Tiong ngansak mensia mayuh nyema bisi pengerusak ti nyadi ba reta sida laban kunteriktor lebuh ti bejalaika projek nya, sida ulih ngeripot ngagai JKR.

    “Aku ngansak semua kunteriktor ngambi bejalaika pengawa enggau betul, aku enda ngira pasal untung kita bisi tauka nadai, lalu aku deka ngaga pengabis manah nyamin pengelikun penguna jalai alun. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads


    Deka nemu berita benung #Viral ninting hari: