Header Ads

  • Berita Tebaru

    Kurup muji pemutus ti digaga Kort Besai

    Tan Sri Joseph Kurup
    KUCHING: Pemutus besai ke digaga Kort Besai kemari ti mutuska seduai laki bini ti bela udah megai pengarap Islam sereta laki bini ti enda nukar pengarap patut meri pemendar ngagai anak sida megai pengarap Islam, nyadi pemenang ngagai semua peranak Malaysia laban nya ngayanka pekara pupu bansa di menua tu, pia ku Menteri di Opis Menteri Besai, Tan Sri Joseph Kurup.

    Sida lima ti ngarika Akim Kort Apil iya nya Tan Sri Zulkefli Ahmad Makinudin, Ketuai Akim Sabah enggau Sarawak Tan Sri Richard Malanjum sereta Akim Kort Besai Tan Sri Zainun Ali, Tan Sri Abu Samah Nordin enggau Tan Sri Ramly Ali nejuka sida ari sepiak nukar, pengajar tadika, M. Indira Gandhi, tiga iku anak iya ari ex-laki iya ti udah megai pengarap Islam, Muhammad Riduan Abdullah (suba dikelala enggau nama K. Pathmanathan).

    Kurup ke mega, menteri megai pangku pengawa Integrasyen Bansa, nyemetak madahka kes ti dikumbai iya “kes lama ti dibatak ari gaya asal sereta bisi pengerindu nya pulaika pemaik ngagai pengawa ngakim ti enda besiping ke alai undang-undang ba atas semua kitai”.

    “Aku pechaya tu jalai mansang ngagai Malaysia nyadi sebuah menua ke jelan iya majoriti Islam.Aku sinu meda Pn. Indira enggau sida sebilik ba penanggul benung ditapi sida sereta ulih betan. Pekara tu semina ulih diberi awak belega lebuh anak indu iya ditemu lalu begulai baru enggau indai iya.

    “Aku pechaya bala akim dalam kes tu udah bejalaika undang-undang nitihka prinsip mensia,” ku Kurup madah ngagai The Borneo Post kemari.

    Iya nyemetak madah diatu maya nyumanka bida ideologi jalai pengarap ngagai kededua piak.

    “Diatu, maya ke patut endur nyumanka bida ideologi ti mambarka. Ruang bilik ti napi bemacham penekul enggau pemar tang ba chunto ke baka tu, nadai siku apai indai bisi hak nejuka orang ari sepiak nukar jalai pengarap anak sida lalu nulak hak apai indai ke bukai ngagai anak sida.

    “Tu udah dijamin dalam jaku penerang ke alai nadai apai indai bisi hak siti piak nukar jalai pengarap anak sida tauka anak mit ngagai sebarang sistem pengarap tauka jalai pengarap enggau nadai pemendar ari kededua piak, apai indai,” ku Kurup nambah.

    Iya muji pemutus Kort Besai laban nya udah mutarka sebarang pengerapas penerang tauka penyaru penemu pasal pekara tu.

    “Diatu kitai pechaya polis deka neritka atur ti manah dikena nyaup nyidi enggau ngulaika baru nembiak ti lenyau, ditaban lari,” ku Kurup, ke mega Kaban Parlimen (MP) Pensiangan, Sabah.

    Bala anak Indira Gandhi, dua indu enggau siku lelaki, diatu beumur 20, 19 enggau semilan taun udah ditukar apai sida megai pengarap Islam, Muhammad Riduan, 47, dalam bulan April 2009 enggau nadai pemendar ari (Indira Gandhi), pengudah iya nukar jalai pengarap ngagai Islam.

    Bala anak iya maya nya beumur 12 enggau 11 taun, sereta 11 bulan. Anak indu pengkuan begulai enggau Muhammad Riduan lalu dua iku ke tuai begulai enggau indai sida. #UtusanBorneo

    No comments

    Post Top Ad