Header Ads

  • Berita Tebaru

    Lebih 100 iti lampu trafik di Kuching deka dikemanah

    GAYA TRAFIK: Dr Sim (kanan) mandangka video dalam telefon pintar ke bela dikena matau gaya trafik ba lampu trafik ke udah disikap enggau Sistem Smart. Bela dipeda Chairman MPP Lo Khere Chiang.
    KUCHING: Opis Menteri Kunsil Kandang Menua deka ngangkatmanah lebih 100 iti lampu trafik ngelingi Mengeri Kuching dalam timpuh lima taun ti deka datai.

    Menteri Opis nya, Datuk Dr Sim Kui Hian madah lampu trafik deka disikap enggau Sistem Smart ngambi ulih ngelanchar pejalai perengka pengangkut.

    Ku iya, lebih 30 iti lampu trafik ke nguna sistem lama dalam kandang Majlis Bandaraya Kuching Selatan(MBKS) enggau Opis Kunsil Padawan (MPP) udah diganti ngena Sistem Smart ba taun ke udah.

    “Bisi 150 iti lampu trafik ngelingi Mengeri Kuching lalu kitai merambu nyikap semua nya nguna Sistem Smart,’ku iya bejaku ngagai pemberita pengudah bejadi Lampu Trafik Sistem Smart di simpang Kampung Haji Baki- Jalai Batu Kitang ditu, kemari.

    Meretika sistem nya begunaka belanja ke besai, Dr Sim madah pengawa deka diadu chara berenggat.

    Sistem pintar tu ku iya disambung ngagai sistem komputer ke ba dalam bilik pematau trafik, lalu nguna kamera sereta sensor ti ulih nemu gaya trafik lalu matau pengelanchar pejalai perengka pengangkut.

    “Disikap enggau teknologi pintar, sistem ulih nemu gaya pengelanchar tauka pemayuh perengka pengangkut ti betengahka jalai.

    Enggau nya lampu trafik ulih nentuka pengelama ubah chura lampu,” ku iya nerang.

    Sistem trafik ke lama netapka timpuh ke sama endur lampu trafik berubah chura iya nya ari gadung ngagai mirah lalu sistem tu udah enda engkeman diguna agi.

    Dr Sim netapka lampu trafik di Mengeri Kuching deka disikap enggau sistem pintar dalam timpuh lima taun ti deka datai.

    Kelimpah ari nya ku iya nandu, kamera ke dipasang ulih nyaup ngangkatka pengelikun di Menegri Kuching.

    “Kamera enggau sensor ke dipasang mantu otoriti matau pekara ke nyadi di jalai sereta di kaki lima lalu nyaup nyeliah ulah jai arika nyadi,” ku iya. #UtusanBorneo

    No comments

    Post Top Ad